Жиззах вилояти Фориш тумани ҳокими ўринбосари 20 минг доллар пора олаётганида қўлга тушди. Бу ҳақда Давлат хавфсизлик хизмати матбуот хизмати хабар берди.
Маълум қилинишича, ҳокимият органи мансабдор ходимининг ноқонуний ҳаракати коррупцияга қарши курашиш йўналишида ДХХ ходимлари томонидан олиб борилган тезкор-қидирув тадбирлари давомида фош этилди.
У ўзининг мансаб мавқейидан фойдаланиб, 2025 йилнинг июнь ойида қишлоқ хўжалиги соҳасига ихтисослашган МЧЖ томонидан аукцион савдолари орқали ютиб олинган 204 гектар суғориладиган ер майдонини туман ҳокимлиги захирасига қайтармаслик ва келгусида ушбу ердан эркин фойдаланишида раҳнамолик қилиш учун 30 минг доллар талаб қилган.
Шундан ҳозир 20 минг долларни беришини, қолган 10 минг долларини эса ҳосил йиғимидан сўнг бериши кераклигини айтган. Ҳоким ўринбосари сўралган пулдан 20 минг долларни ўзининг хизмат автомашинасида олган вақтида ашёвий далиллар билан ушланган.
Ҳолат юзасидан мазкур мансабдор шахсга нисбатан Жиноят кодексининг 168-моддаси 4-қисми “а” банди (жуда кўп миқдорда фирибгарлик) ва 211-моддаси 3-қисми “а” банди (жуда кўп миқдорда пора бериш) билан жиноят иши қўзғатилиб, қамоқ эҳтиёт чораси қўлланилди. Ҳозирда дастлабки тергов ҳаракатлари олиб борилмоқда.
Жиноят кодексига кўра, жуда кўп миқдорда фирибгарлик учун БҲМнинг 400 бараваридан 600 бараваригача миқдорда жарима ёки 8 йилдан 10 йилгача озодликдан маҳрум қилиш билан жазоланади.Етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди.
Жуда кўп миқдорда пора берган шахс эса 10 йилдан 15 йилгача озодликдан маҳрум қилиш билан жазоланади. Агар шахсга нисбатан пора сўраб товламачилик қилинган бўлса ва ушбу шахс жиноий ҳаракатлар содир этилганидан кейин бу ҳақда 30 сутка мобайнида ўз ихтиёри билан арз қилса, чин кўнгилдан пушаймон бўлиб, жиноятни очишда фаол ёрдам берган бўлса, у жавобгарликдан озод этилади.
Изоҳ (0)