Janubiy Koreyada bir haftalik motam e’lon qilindi

Janubiy Koreya qutqaruv xizmati 29-dekabr kuni yuz bergan aviahalokat oqibatida 179 kishi halok bo‘lgani, ikki kishi omon qolganini ma’lum qildi. Bu haqda Yonhap xabar berdi.

Halokat Bangkokdan Muanga parvoz qilayotgan Jeju Air aviakompaniyasining Boeing 737-800 samolyoti belgilangan aeroportga qo‘nayotganda halokatga uchraganida yuz bergan. Samolyot bortida 181 kishi bo‘lgan. Ekipajning faqat ikki a’zosi omon qolgan, ulardan biri jiddiy jarohat olgan.

Dastlabki ma’lumotlarga ko‘ra, samolyot uchish-qo‘nish yo‘lagidan chiqib ketib, beton to‘siq bilan to‘qnashgan va yonib ketgan. Ekspertlar qush bilan to‘qnashuv versiyasini ham ilgari surmoqda. Bu oldi shassining ishdan chiqishiga olib kelgan bo‘lishi mumkin. Ekipaj qo‘nishdan oldin aeroport ustidan aylanib uchib, shikastlanishni ko‘z bilan baholashga harakat qilgan.

Kuchli yong‘in va vayronagarchilik qutqaruvchilarning ishini qiyinlashtirgan bo‘lsa-da, tezkor xizmatlar darhol voqea joyiga yetib kelgan. Janubiy Koreyaning vaqtinchalik prezidenti fojia qurbonlari xotirasiga yetti kunlik milliy motam e’lon qilgan. Samolyotning qora qutilari topilgan.

Jeju Air aviakompaniyasi halok bo‘lganlarning oilalariga hamdardlik bildirgan va hodisa sabablarini aniqlash uchun hukumat bilan hamkorlik qilishini tasdiqlagan. Boeing kompaniyasi tergovga texnik yordam ko‘rsatishga tayyorligini ma’lum qilgan.

Bu bir hafta ichida kuzatilgan uchinchi aviahalokatdir. Birinchisi 25-dekabr kuni Qozog‘istonning Oqtov shahrida yuz berdi. Ozarbayjon samolyoti qulashi oqibatida 38 kishi halok bo‘ldi, 29 kishi omon qoldi. Aviatexnika ko‘zdan kechirilganida teshiklar aniqlandi. Ozarbayjon prezidenti samolyot Grozniy yaqinida o‘qqa tutilgani, bu samolyotni ishdan chiqarganini aytdi. Ilhom Aliyev Rossiyadan uzr so‘rash, aybdorlarni jazolash va kompensatsiya to‘lashni talab qildi.

Ikkinchisi 29-dekabr kuni Boeing 737-800 samolyoti Oslo shahriga favqulodda qo‘nishni amalga oshirdi. Amsterdamga uchayotgan samolyot gidravlikasida nosozlik yuz bergan. Samolyot Oslo aeroportiga qo‘nish chog‘ida uchish-qo‘nish yo‘lagidan chiqib ketib, o‘tlar ustida to‘xtagan. OAV hech kim jabrlanmagani, yo‘lovchilar evakuatsiya qilingani haqida yozmoqda.