Болалар омбудсмани ўзининг Telegramъдаги каналида 2024 йилда бола манфаатларини таъминлаш соҳасида юртимизда рўй берган ўзгаришлар ҳақида маълумот берди.
Жумладан:
"Ўзбекистон Республикаси Олий Мажлисининг Бола ҳуқуқлари бўйича вакили (Болалар омбудсмани) тўғрисида"ги Қонун қабул қилинди.
Қонун билан Ўзбекистонда бола ҳуқуқлари тўғрисидаги қонунчиликка риоя этилиши устидан парламент назоратини амалга оширувчи Болалар омбудсмани институтининг фаолияти ҳуқуқий тартибга солинди.
Ўзбекистонда 2024 йилнинг 1 майидан бошлаб my.gov.uz портали орқали болалар нафақаси ёки моддий ёрдам учун онлайн ариза бериш имконияти яратилди.
Болалар нафақаси ва моддий ёрдам“Ижтимоий ҳимоя ягона реестри” орқали кам таъминланган оилаларга тайинланади.
Болаларни боғчага жойлаштириш соддалаштирилди. Болаларни давлат мактабгача таълим ташкилотига қабул қилиш учун расмийлаштирилган йўлланмаларни мактабгача таълим ташкилотига ахборот тизими орқали юбориш тартиби жорий этилди.
Ўзбекистонда Оилавий болалар уйи битирувчилари юридик техникумларда текин ўқиши мумкин бўлди. Хусусан, Меҳрибонлик уйи ва Болалар шаҳарчаси ҳамда Оилавий болалар уйининг битирувчилари, I-гуруҳ ногиронлиги бўлган шахслар ва ногиронлиги бўлган болалар тоифасидаги абитуриентлар қўшимча қабул параметрлари негизида давлат гранти асосида ўқишга қабул қилинади.
2024 йил 14 ноябрда “Болаларни зўравонликнинг барча шаклларидан ҳимоя қилиш” тўғрисида қонун имзоланди.
Қонунда зўравонлик турлари аниқ белгилаб берилди, жабрланувчи болалар ва уларнинг оилаларини қўллаб-қувватлаш ҳамда мактабларда зўравонликнинг олдини олиш чоралари кўзда тутилди.
Фарзандларни оиланинг камбағаллиги туфайли Меҳрибонлик ва Болалар уйларига жойлаштириш амалиёти бекор қилинди. Эндиликда камбағал оила вакиллари ишга жойлашган тақдирда, боласи уч ёшга тўлгунча боғча харажатлари учун Ижтимоий ҳимоя жамғармасидан компенсация берилади.
Болалар ишлари бўйича миллий комиссиялар фаолияти самарадорлигини ошириш чора-тадбирлари тўғрисидаги Президент Фармони имзоланди.
Болалар масалалари бўйича миллий комиссия вазифалари янгитдан белгиланди, ушбу комиссиясининг янгиланган таркиби ва ҳудудий комиссияларнинг вазифалари тасдиқланди.
Жиноят кодексига ва Маъмурий жавобгарлик тўғрисидаги кодексга болаларга нисбатан оилавий зўравонлик содир этганлик учун жавобгарликни назарда тутувчи ўзгартиришлар киритилди.
Эндиликда болага нисбатан мазкур ҳуқуқбузарлик ёки жиноят содир этилганда ариза берилмаган ҳолларда ҳам иш қўзғатилиб, ҳуқуқий чора кўрилади.
Изоҳ (0)