Россия ва Украина урушда кўчирилган болалар масаласида илк бор юзма-юз музокаралар ўтказди. Бу ҳақда Россия президенти ҳузуридаги болалар ҳуқуқлари бўйича вакил Мария Львова-Беловага таяниб, Euronews хабар берди.
Учрашув Қатар воситачилигида Доҳада бўлиб ўтди. Вакилнинг сўзларига кўра, томонлар 29 нафар бола Россиядан Украинага, 19 нафари эса Россияга қайтарилишига келишиб олган. Омбудсман рўйхатлар аллақачон қайд этилганини қўшимча қилган.
Киевнинг таъкидлашича, Россия—Украина уруши бошланганидан бери Украинадан 19 мингдан ортиқ бола олиб кетилган. Львова-Белова бу маълумотни сохта деб атаган.
Ўтган йилнинг март ойида Халқаро жиноий суд Львова-Беловани ҳамда Россия президенти Владимир Путинни украиналик болаларни ноқонуний депортация қилишда айблаб, ҳибсга олишга ордер берган эди.
Украиналик депортация қилинган болалардан бири Ростислав. У Херсон яқинида ўғирлаб кетилган. Бола ҳарбий тайёргарликдан ўтаётган жойдан қочишга муваффақ бўлган.
У ер қўрқинчли эди. Мен у ердан қочмоқчи эдим, аммо оқибатлари даҳшатли бўлишини билардим, — дея эслайди Ростислав.
Ҳозиргача мен ва ҳамкасбларим очиқ манбалар ва бошқа воситалар ёрдамида 60 та шундай жойларни топишга муваффақ бўлдик. Улар нафақат Украина билан чегарада, балки Россиянинг узоқ шарқий қисмида ҳам жойлашган, — таъкидлаган ҳарбий жиноятларга ихтисослашган украиналик терговчи Владислав Гаврилов.
Изоҳ (0)