ИИВ ҳузуридаги иккинчи минтақавий ҳудуд 3-сон тергов ҳибсхонасида сақланаётган Ш.Х. (аёл) 2 ёшли боласини ижтимоий-ҳуқуқий ёрдам кўрсатилишини ёки вақтинча давлат қарамоғига олинишини сўраб мурожаат қилган. Бу ҳақда Болалар омбудсманига ахборот хизмати хабар бермоқда.
Мурожаат Ш.Х. содир этган жинояти тергови доирасида ҳозирда мазкур тергов ҳибсхонасида сақланаётгани, оилада ёлғиз боқувчи экани, вояга етмаган фарзанди М.Х. (2022 йилда туғилган ўғил бола) борлигини айтган. У икки ёшли ўғли ҳозирда нафақада бўлган ота-онасининг қарамоғида қолганлиги, фарзанди туғма хасталиги, ўғлига тиббий, моддий, ижтимоий-ҳуқуқий ёрдам кўрсатилишини ёки вақтинча давлат қарамоғига олинишини сўраган.
Болалар омбудсмани сўрови асосида мазкур ҳолат Ижтимоий ҳимоя миллий агентлиги томонидан ўрганилган.
Ўрганиш давомида комплекс ижтимоий хизмат кўрсатувчи ходим томонидан оилага ижтимоий иш бўйича кейс очилган. шунингдек, “Саховат ва кўмак” жамғармаси маблағлари ҳисобидан моддий ёрдам ажратиш чоралари кўрилди. Вояга етмаган М.Х. “Инсон” ижтимоий хизматлар маркази томонидан бувиси Х.М. га патронатга топширилди (моддий таъминот назарда тутилган), дейилади омбудсман ахборотида.
Қўшимча қилинишича, Болалар омбудсмани мазкур вазиятда бола манфаатлари юзасидан ўз кузатувини давом эттиради.
Изоҳ (0)