Самарқанд вилоятида онаси тергов ҳибсхонасида бўлган вояга етмаган болалар давлат ҳимоясига олинди. Бу ҳақда Олий Мажлиснинг Инсон ҳуқуқлари бўйича вакили (омбудсман) ахборот хизмати хабар бермоқда.
Инсон ҳуқуқлари бўйича вакилга вилоятнинг Каттақўрғон шаҳридаги 7-сонли тергов ҳибсхонасида сақланаётган фуқаро Х.Н. мурожаат қилиб, уч нафар вояга етмаган фарзанди борлигини ва улар маҳбуснинг отаси Д.А. билан бирга яшаётганини инобатга олиб, фарзандлари учун отасини васий этиб тайинлашда амалий ёрдам сўраган.
Ушбу мурожаат назоратга олиниб, ўрганиш учун омбудсманнинг Самарқанд вилоятидаги минтақавий вакилига юборилган. Ушбу мурожаат омбудсманнинг минтақавий вакили, Қўшработ туман ҳокимлиги ва «СОС Ўзбекистон Болалар маҳаллалари» уюшмасининг Самарқанд шаҳридаги филиали билан ҳамкорликда ўрганилди. Мурожаатчи Х.Н. билан Каттақўрғон шаҳридаги 7-сонли тергов ҳибсхонасида учрашилиб, мурожаатдаги сабаблар ўрганиб чиқилди.
Мурожаатчи Х.Н.нинг отаси Д.А.ни болаларга васий этиб тайинлаш учун унинг оилавий шароитлари ўрганилди. Аниқланишича, Д.А.нинг 2-турмуш ўртоғидан 3 нафар вояга етмаган фарзанди бор ва улар отасининг қарамоғида. Бундан ташқари, мурожаатчи Х.Н.нинг яна 3 нафар фарзандининг кунлик эҳтиёжлари учун уйда моддий шароитлар мавжуд эмас.
Юқоридагиларни инобатга олиниб, мурожаатчи Х.Н.нинг 3 нафар фарзанди Қўшработ тумани ҳокимлиги ҳамкорлигида «СОС Ўзбекистон Болалар маҳаллалари» уюшмасининг Самарқанд шаҳридаги филиалига жойлаштирилди.
Мурожаатчи Х.Н.га 3 нафар фарзанди филиалга жойлаштирилгани, у ернинг яшаш шароитлари яхши экани, фарзандлари ёзги лагер ва боғчага бораётгани тўғрисида маълумотлар берилди.
Изоҳ (0)