Президент Шавкат Мирзиёев 27 апрель куни «Ўзбекистон Республикасининг Конституциявий суди тўғрисида»ги қонунни имзолади, деб хабар беради Telegram’даги «Ҳуқуқий ахборот» канали.
Қонунга кўра, Конституциявий суд доимий фаолият юритувчи суд ҳокимияти органи бўлиб, қонун чиқарувчи ва ижро этувчи ҳокимият ҳужжатларининг Конституцияга мувофиқлиги тўғрисидаги ишларни кўради.
Конституциявий суд конституциявий ҳуқуқ ва эркинликлари муайян ишда қўлланилган ва Конституцияга мувофиқ бўлмаган қонунда бузилган деб ҳисобловчи фуқаролар ҳамда юридик шахсларнинг шикоятларини ҳам кўриб чиқиши белгиланган.
Конституциявий суд раис ва унинг ўринбосарини қўшган ҳолда 9 нафар судьядан иборат бўлади (илгари 7 нафар эди).
Конституциявий судга мурожаат қилиш ҳуқуқига эга бўлган субъектлар қаторига қуйидагилар киритилди:
- Инсон ҳуқуқлари бўйича вакил (омбудсман) ўринбосари – Бола ҳуқуқлари бўйича вакил;
- Инсон ҳуқуқлари бўйича Ўзбекистоннинг Миллий маркази;
- Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил.
Эслатиб ўтамиз, «Ўзбекистон Республикаси Конституциявий суди тўғрисида»ги қонуннинг 25-моддасида Конституциявий судга кўриб чиқиш учун масалалар киритиш ҳуқуқи Олий Мажлиси палаталари, Ўзбекистон Президенти, Қонунчилик палатасининг Спикери, Сенат раиси, Қорақалпоғистон Республикаси Жўқорғи Кенгеси, Қонунчилик палатаси депутатлари умумий сонининг камида тўртдан бир қисмидан иборат депутатлар гуруҳи, Сенат аъзолари умумий сонининг камида тўртдан бир қисмидан иборат сенаторлар гуруҳи, Олий суд раиси, Олий хўжалик суди раиси, бош прокурор, Ҳисоб палатасининг раиси ҳамда Конституциявий суднинг камида уч судьясидан иборат гуруҳига берилган эди.
Қонун расмий эълон қилинган кундан эътиборан кучга киради.
Изоҳ (0)