Олий Мажлиснинг Бола ҳуқуқлари бўйича вакили А.Юнусова ҳамда Самарқанд вилоятининг тегишли ташкилотлари мутасаддилари 24 декабрь куни «Док-1 Макс» препарати бўйича ўрганиш ўтказди. Бу ҳақда Омбудсман ахборот хизмати хабар берди.
Ўрганишлар натижасига кўра, вилоят болалар кўп тармоқли тиббиёт марказида сентябрь декабрь ойларида 21 нафар бемор ўткир буйрак зарарланиши билан текширилган, даволанган. Беморлар Жиззах, Қашқадарё, Навоий ҳамда Самарқанд вилоятидан бўлган, 3 нафар бемор соғломлаштирилиб уйига жавоб берилган ва 18 нафари вафот этган. Беморларнинг барчаси 6 ёшгача бўлган болалар. Уларнинг 15 нафари 3 ёшгача бўлган болалар.
Беморларнинг яқинларидан уларнинг касалланиш сабаблари суриштирилганда уларда шамоллаш аломатлари бўлганлиги ва даволаш мақсадида «Док-1 Макс» препарати қабул қилишганлигидан сўнг аҳволи оғирлашганлигини баён қилишган. «Док-1 Макс» препаратининг ҳар 10 млда парацетамол — 500 мг, гвайфенезин — 200 мг, фенилефрина гидрохлорид — 10 мг мавжуд. Мутахассислар «Док-1 Макс» препарати қўлланилиши кўрсатмасида препаратни 2 ёшдан қўллаш мумкинлиги кўрсатилганлиги, лекин шундай таркибли бошқа компаниялар препаратлари асосан 12 ёшдан кейин қўллашга рухсат берилганини таъкидлаган.
«Фуқаролар соғлиғини сақлаш тўғрисида»ги қонуннинг 40-моддасида патологик-анатомик тадқиқотлар соғлиқни сақлаш муассасаларида одам ҳаётлигида ҳамда ўлганидан сўнг ташхис қўйиш (биопция ва аутопция), шунингдек, клиник шароитда ташхис қўйиш ва касалликни даволаш ишларининг тўғри олиб борилганлигини назорат қилиш, ўлим сабаблари ҳақида аниқ маълумотлар олиш мақсадида ўтказилиши белгиланган.
Шу билан биргаликда соғлиқни сақлаш вазирининг буйруғи билан тасдиқланган «Патологик-анатомик тадқиқотлар ўтказиш тартиби тўғрисида»ги низомга кўра даволаш-профилактика муассасаларида вафот этган шахсларнинг ўлим сабабларини аниқлаш мақсадида патологик-анатомик тадқиқотлар ўтказиш белгиланган, лекин вафот этган беморларнинг бирортаси ҳам патологик-анатомик тадқиқотдан ўтказилмаган.
Ҳозирда Соғлиқни сақлаш вазирлиги томонидан тузилган ишчи гуруҳи ўз ўрганишларини давом эттирмоқда. Самарқанд шаҳар прокуратураси ҳар бир ўлим ҳолати бўйича суриштирув-тергов олиб бормоқда. Бола ҳуқуқлари бўйича вакил Самарқанд вилояти прокурори биринчи ўринбосаридан ҳолат бўйича чуқур ўрганиш олиб боришларини ва ҳар бир ҳолатда айбдорлар жазосиз қолмаслиги, қонун устуворлиги таъминланиши шартлигини сўраган. Бола ҳуқуқлари бўйича вакил томонидан ҳолат тўлиқ назоратга олинган.
Мавзуга доир:
Изоҳ (1)
Lanatlar boʻlsin Bolalarni umriga zomin boʻlganlarga.Alloh jazosini bersin.