Қашқадарё вилоятининг Ғузор туманида қуввати 300 мегаватт бўлган қуёш фотоэлектр станциясини қуриш ва ундан фойдаланиш бўйича ўтказилган тендер танловида дастлабки ғолиби эълон қилинди. Бу ҳақда Энергетика вазирлиги матбуот хизмати хабар берди.
.jpg)
Мазкур лойиҳа Осиё тараққиёт банки кўмагида “Умумий қуввати 300 МВт бўлган қуёш фотоэлектр станцияси қуриш лойиҳасини ишлаб чиқиш ва маслаҳат хизматларини кўрсатиш Дастури” (ADB Phase 2) доирасида амалга оширилган бўлиб, унга иккита халқаро компания қизиқиш билдирган. Молиявий таклифларнинг очилиш натижалари:
- Abu Dhabi Future Energy Company PJSC — Masdar (БАА) компанияси томонидан қуёш электр станциясидан ишлаб чиқариладиган 1 кВт/соат электр энергияси учун 3 АҚШ сенти ҳамда аккумулатор тизимининг 1 МВт/соат мавжудлиги учун 6,33 АҚШ доллари;
- ACWA POWER-Saudi Listed Joint Stock Company (Саудия Арабистони) компанияси томонидан қуёш электр станциясидан ишлаб чиқариладиган 1 кВт/соат электр энергияси учун 3,0518 АҚШ сенти ҳамда аккумулатор тизимининг 1 МВт/соат мавжудлиги учун 24,425 АҚШ доллари таклиф қилинган.
“Қашқадарё вилояти Ғузор туманида қуввати 300 мегаватт бўлган қуёш фотоэлектр станциясини қуриш” лойиҳаси доирасида Masdar компанияси тендернинг дастлабки ғолиби, ACWA POWER-Saudi Listed Joint Stock Company эса компанияси тендернинг захира ғолиби деб эълон қилинган.
Танлов ҳужжатлари яқин кунларда Тендер комиссияси томонидан ОТБ маслаҳатчилари иштирокида кўриб чиқилади ва тасдиқланади.
Мазкур танлов Ўзбекистон Энергетика вазирлиги, Инвестициялар, саноат ва савдо вазирлиги, “Ўзбекистон миллий электр тармоқлари” АЖ, Иқтисодиёт ва молия вазирлиги ва Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан ўтказилган. Молиявий таклифларнинг талаб этилган мезонларга мувофиқлиги баҳолагандан сўнг, лойиҳани амалга оширадиган инвесторнинг номи эълон қилинган.
Лойиҳа Ғузор туманидаги 300 мегаватт қувватга эга қуёш фотоэлектр станцияси ва 1 соат давомида 75 мегаватт қувват берадиган энергия сақлаш тизими (аккумулатор)ни ўз ичига олади.
Тендерда ғолиб бўлган инвестор қуёш фотоэлектр станциясини лойиҳалаштиради, молиялаштиради ва бошқаради.
Қуёш фотоэлектр станцияларининг қурилиши
Ўзбекистонда 2021 йилнинг май ойида Самарқанд вилоятининг Каттақўрғон тумани ва Жиззах вилоятининг Ғаллаорол туманида ҳар бири 220 МВт қувватга эга иккита янги қуёш электр станциясини давлат-хусусий шериклик доирасида қуриш бўйича тендер ғолиби эълон қилинганди. БААнинг қайта тикланадиган энергия соҳасидаги Masdar компанияси мамлакатда ва Марказий Осиё минтақасида электр энергияси ишлаб чиқаришга энг паст тарифларини таклиф қилган.
Самарқанд ва Жиззах вилоятларидаги қуёш электростанциялари йилига 1,1 миллиард киловатт-соатгача қайта тикланадиган электр энергияси ишлаб чиқариш имкониятига эга бўлади. Уларнинг ишлаши туфайли йилига ўртача 110 минг тонна ёки уларнинг бутун хизмат даври давомида жами 3,4 миллион тонна карбонат ангидрид эмиссиясининг олди олинади.
Ушбу лойиҳа “Қуёш энергетикасини кенгайтириш” дастури кўмагида амалга оширилмоқда. Унинг доирасида аввалроқ IFC тендер ўтказиш бўйича маслаҳат хизматларини кўрсатган, Жаҳон банки эса станциялар томонидан ишлаб чиқарилган электр энергиясини сотиб олиш бўйича жами 12 миллион АҚШ долларигача бўлган (ҳар бири учун 6 миллион АҚШ долларидан) мажбуриятларни бажариши учун банк кафолатларини тақдим этади.
Қуёш электростанцияларини ишга тушириш учун Masdar лойиҳа компанияларига ўз капиталидан 193 миллион доллар инвестиция киритади. Masdar, шунингдек, Осиё тараққиёт банки, Европа тикланиш ва тараққиёт банки, Европа инвестиция банки ҳамда Осиё инфратузилма инвестициялари банки томонидан 216 миллион доллар қарз маблағларини жалб қилади.
Изоҳ (0)