Ўзбекистонда юзага келган электр энергия танқислиги ва табиий газ етишмовчилиги боис ҳудудлардаги метан газ заправкалари ишламаётгани, фаолият юритаётганларида ҳам турнақатор навбатлар юзага келгани, оқибатда эса бу йўлкира нархларига таъсир қилгани хабар берилганди.
«Дарё»нинг Қашқадарё вилоятидаги мухбири Муроджон Амиров ҳудудда йўловчилар ва ҳайдовчилар билан суҳбатлашиб, вазиятни ўрганган эди. Бироқ ўрганишлар давомида мухбир ўзини қизиқтирган саволларга вилоят Транспорт бошқармаси масъулларидан жавоб ололмаганди.
Мақола эълон қилингач, Қашқадарё вилоят Транспорт бошқармаси масъуллари ҳолатга изоҳ берди.
Юртимизда юзага келган энергоресурслар тақчиллиги билан боғлиқ вазиятнинг жамоат транспорти соҳасига салбий таъсирини камайтириш мақсадида зарур ишлар қилинмоқда. Хусусан, вилоятимизда ҳам йўловчи ташувчи транспорт воситалари (автобус, микроавтобус, Damas) мунтазам қатновини ташкил этиш учун барча чора кўриляпти. Вилоят ҳокимлиги бошчилигида ишлаб чиқилган иш режага асосан, ҳар бир шаҳар ва туманда алоҳида ёнилғи қуйиш шохобчалари танлаб олиниб, уларга ташувчи корхоналарни бириктириш ҳамда автобус ва йўналишли таксилар учун махсус йўлак ташкил этиш белгиланган, — дейди бошқарма ахборот хизмати раҳбари Мирзоҳид Жўраев.Масъулнинг таъкидлашича, вилоятда жамоат транспортларида йўлкира нархи ошмаган.
Кўрилаётган чоралар натижасида ҳар куни автобус, йўналишли такси (микроавтобус ва Damas)ларнинг қатновга тўлақонли чиқиши, ҳаракат жадвалларига амал қилинишига эришиляпти. Жамоат транспортида йўлкиранинг асоссиз ошишининг олди олиняпти. 12 декабрь ҳолатига кўра, вилоят бўйича 286 та автобус, 25 та микроавтобус ва 1700 дан ортиқ Damas йўналишларга чиқарилган. Бу эса йўналишларда қатновни амалга ошириши керак бўлган жамоат транспорти умумий таркибининг қарийб 90 фоизини ташкил этади, — дейди у.Мирзоҳид Жўраевнинг қўшимча қилишича, вилоят ҳокими қарори бўйича шаҳар ичида автобус киши бошига 1500 сўм олса, микроавтобус ҳар бир кишига 2000 минг сўмга хизмат кўрсатади.
Шаҳар атрофи ва туманларга қатнайдиган автобуслар километражига тариф қўяди. Ҳозир Damas йўналишларида тариф электрон тендер натижаси бўйича белгиланмоқда. Агар ташувчи километрига 100 сўм таклиф қилса ва йўналишни ютиб олса, шу тариф бўйича юришга мажбур. Қайсидир Damas уюшмалари электрон тендерда километрига 250 сўм таклиф қилган ҳолатлар ҳам бор, яъни бу 10 километрга 2500 сўм бўлади дегани. Йўналишсиз таксилар яъни сариқ рангли ташувчиларга аниқ бир тариф ишлаб чиқилмаган. Ҳукумат қарори ёки бирор норматив ҳужжат билан, ўзаро келишув асосида дейилган, — дейди Мирзоҳид Жўраев.Шунингдек, вилоятнинг барча туман ва шаҳарларида жамоат транспортлари учун махсус метан газ шохобчалари ажратилган бўлиб, одам ташувчи транспорт воситаларига навбатсиз газ қуйиб берилиши ҳокимликлар назоратига олинган.
Изоҳ (0)