Исроилнинг El Al авиакомпанияси Тель-Авивдан Москвага парвозларни тўхтатди. Бу ҳақда авиакомпания матбуот хизмати хабар берди.
“Россия ҳаво ҳудудидаги воқеалар туфайли El Al авиакомпанияси Тель-Авив — Москва йўналишидаги барча рейсларни келгуси ҳафтагача тўхтатмоқда”, дейилади баёнотда.
Вазият кейинги ҳафтада қайта кўриб чиқилади ва парвозларни қайта тиклаш ёки тикламаслик тўғрисида қарор қабул қилинади.
25 декабрь куни Бокудан Грознийга учаётган Azerbaijan Airlines йўловчи самолёти Қозоғистонда ҳалокатга учради. Самолётда бўлган 67 кишидан 38 нафари ҳалок бўлган.
Самолётга ракета зарбаси берилганми?
Euronews телеканалининг хабар беришича, Озарбайжон ҳукуматидаги манбалар Қозоғистоннинг Оқтов шаҳрида ҳалокатга учраган Azerbaijan Airlines самолётининг қулашига Россиянинг ер ҳаво ракетаси сабаб бўлганини тасдиқлаган.
Дастлабки маълумотларига кўра, Грозний устидан учиб бораётган вақтда самолётга ҳаво мудофаа тизими билан зарба берилган. Зенит ракета ҳаводаги самолёт ёнида портлаб, металл парчалар самолётнинг дум қисмига зарар етказган.
Бироқ учувчиларнинг фавқулодда қўниш ҳақидаги сўровларига қарамай, Россиянинг бирорта аэропортига қўнишга рухсат бермаган. Шундан сўнг экипажга Каспий денгизи орқали Қозоғистоннинг Оқтов шаҳри томон учиш буюрилган.
Euronews телеканалининг маълум қилишича, Россия армияси томонидан қўлланилган радиотўлқинли қуроллар самолётнинг GPS навигация тизимига зарар етказган.
Изоҳ (0)