Қозоғистоннинг Оқтов шаҳри яқинида қулаган самолёт ҳалокатига Россия зенит ракетаси сабаб бўлган. Бу ҳақда Euronews телеканали Озарбайжон ҳукуматидаги манбаларига таяниб хабар бермоқда.
Озарбайжон ҳукуматидаги манбалар Қозоғистоннинг Оқтов шаҳрида ҳалокатга учраган Azerbaijan Airlines самолётининг қулашига Россиянинг ер ҳаво ракетаси сабаб бўлганини Euronews телеканалига “эксклюзив тарзда” тасдиқлаган.
Дастлабки маълумотларига кўра, Грозний устидан учиб бораётган вақтда самолётга ҳаво мудофаа тизими билан зарба берилган. Зенит ракета ҳаводаги самолёт ёнида портлаб, металл парчалар экипаж ва йўловчиларни жароҳатлаган. Бироқ учувчиларнинг фавқулодда қўниш ҳақидаги сўровларига қарамай, Россиянинг бирорта аэропортига қўнишга рухсат бермаган. Шундан сўнг экипажга Каспий денгизи орқали Қозоғистоннинг Оқтов шаҳри томон учиш буюрилган.
Маълум қилинишича, Россия армияси томонидан қўлланилган радиотўлқинли қуроллар самолётнинг GPS навигация тизимига зарар етказган.
Ракета Панцирь-С ҳаво мудофаа тизимидан учирилган, деб хабар бермоқда АнеwЗ нашри Озарбайжон ҳукуматидаги манбаларига таяниб.
Боку-—Грозний рейсининг вақти Украина армияси томонидан Чеченистонга дрон зарбалари берилган вақтга тўғри келди. Чеченистон Хавфсизлик кенгаши раҳбари Ҳамзат Қодиров 25 декабрь куни эрталаб Грознийга дронлар билан ҳужум уюштирилганини тасдиқлади.
Тармоқларда пайдо бўлган видео J2-8243 рейси Грознийга учаётган вақти Чеченистонда олинган бўлиб, унда Украина дрони Панцирь-С тизими ёрдами билан уриб туширилиши акс этган.
2014 йил 12 июль куни Украина ҳудудида ҳалокатга учраган Малайсия Airlines авиакомпаниясига тегишли Boeing-777 самолётининг қулашига ҳам Россия томони айбдор деб топилганди. Гаага суди Малайзия самолёти Первомайск шаҳрида “Бук” ҳаво мудофаа тизими томонидан уриб туширилганини маълум қилган.
Агар юқоридаги даъволар ўз тасдиғини топса, Россия сўнгги ўн йил ичида иккинчи бор йўловчи самолётига зарба берган бўлиб чиқади. Бу сафар қурбонлар орасида россияликлар билан бирга, қўшни давлатлар фуқаролари ҳам бор.
Фожиа вақти самолёт бортида жами 67 киши, жумладан, Озарбайжон (37), Россия (16), Қозоғистон (6) ва Қирғизистон (3) фуқаролари бўлган. Улардан 38 нафари фалокат қурбонига айланди.
Изоҳ (0)