Россияда 2021 йилда ишлаш учун расмийлаштирилган жами патентларнинг ярмидан кўпи Ўзбекистон фуқаролари ҳисобига тўғри келади. Бу ҳақда мамлакат ИИВнинг миграция ҳолати бўйича кўрсаткичларида қайд этилган, деб хабар беради «ТАСС».
Идора маълумотларига кўра, 2021 йилнинг январь—декабрь ойларида ишлаш учун 2 221 816 та патент расмийлаштирилган бўлиб, уларнинг 1 316 569 таси Ўзбекистон фуқароларига тегишли. Шунингдек, Тожикистон фуқаролари — салкам 787 мингта, Озарбайжон фуқаролари эса 65 мингга яқин патент олган. Бундан ташқари, Украина (37 минг) ва Молдова (17 минг) фуқароларига ҳам патентлар расмийлаштирилган.
2021 йилда Россияда мигрантларнинг ишлаши учун расмийлаштириладиган патентлар сони қарийб икки баробарга ошган. Шунингдек, ўтган йили чет эл фуқароларига ишлаш учун берилган рухсатномалар сони ҳам ошган. 2021 йилда Россия ИИВга мамлакат ҳудудида меҳнат фаолиятини олиб бораётган хорижлик фуқаролар билан тузилган меҳнат шартномалари тўғрисида 1 673 342 та хабарнома келиб тушган.
Аввалроқ Москва ҳукумати қурилишларда мигрантлардан бутунлай воз кечишни таъминлайдиган режани тайёрлаши, Ўзбекистон фуқаролари Россияга кирган кундан бошлаб 15 кун ичида рўйхатдан ўтиш заруратидан озод этилиши мумкинлиги, Россия ҳукумати 150 минг ўзбекистонлик муҳожирнинг мамлакатга киришига қўйилган тақиқни олиб ташлагани тўғрисида хабар берилганди.
Изоҳ (0)