Россияда қисман сафарбарлик эълон қилингани ва умуман мураккаб геосиёсий вазиятга қарамасдан, Россияга муҳожирлар оқими ўзгармаган. Бу ҳақда Миграция жараёнларини таҳлилий ва амалий тадқиқ қилиш маркази раҳбари Вячеслав Поставнин маълум қилди, деб ёзади «Известия».
Шу билан бирга, Россияда бўлиб турган чет эл фуқаролари паспорт олиш жараёнини тўхтатиб қўймоқда ва вақтинчалик яшаб туриш учун рухсатнома ёки истиқомат гувоҳномаси билан чекланмоқда.
«Аввалгидек, Ўзбекистон, Тожикистон, Қирғизистон фуқаролари Россияда ишлашга ва яшашга интилмоқда. Иккинчи навбатда эса булар Озарбайжон, Арманистон фуқаролари. Шунингдек, украиналиклар, Молдова фуқаролари ҳамбор. Умуман олганда, худди аввалгидек. Ахир у ерда, айниқса, Тожикистонда ва Ўзбекистонда ишлар кўпайиб қолгани йўқ, яшаш ҳам яхшиланиб қолгани йўқ. Россияда эса бандлик ҳам, юқори даражали маошлар ҳам сақланиб қолмоқда», — деди у.
Унинг фикрича, фақат Россиядаги қисман сафарбарлик туфайли, фуқаролик олмоқчи бўлган шахсларнинг хатти-ҳаракатлари ўзгарган.
«Биринчи навбатда гап раҳбарияти ўз фуқароларига Украина ҳудудидаги жанговар ҳаракатларда қатнашишни тақиқлаб, бунинг учун жиноий жавобгарлик белгилаган мамлакатлар фуқаролари ҳақида бормоқда. Айниқса Тожикистон фуқаролари таранг ҳолатда қолди», — деди эксперт.
Ҳозир, унинг сўзларига кўра, шундай тенденция кузатилмоқдаки, чет элликлар вақтинчалик яшаш учун рухсатнома ёки истиқомат гувоҳномаси билан чекланиб, паспорт олиш жараёнини тўхтатиб қўймоқда.
«Бу ҳужжатлар билан яшаш мумкин, ишлаш мумкин. Қисман сафарбарлик таъсирига тушмайдиган чет эллик аёллар, худди аввалгидек, Россия паспортларини олишда давом этмоқда», — деди Поставнин.
Аввалроқ россиялик журналист ва телебошловчи Ольга Романова МДҲ мамлакатлари фуқаролари Россия томонидан урушга жўнатилаётганини маълум қилганди.
Шунингдек, Марказий Осиё мамлакатларидан келган муҳожирлар ихтиёрий ҳарбий хизмат ҳақида шартномалар тузишга мажбурланаётгани ҳақида ҳуқуқ ҳимоячиси Валентина Чупик ҳам айтиб ўтди.
Эслатиб ўтамиз, 20 сентябрь куни Россия Давлат думаси янги қонун қабул қилди, унга мувофиқ, армияда бор-йўғи бир йил хизмат қилганлар ушбу мамлакат фуқаролигини қўлга киритиши мумкин бўлади.
Шундан кейин Ўзбекистон Бош прокуратураси хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.
Шунингдек, Россиядаги ҳарбий хизматга чет эл фуқаролари, шу жумладан, Марказий Осиё давлатларидан келган меҳнат муҳожирлари мажбурий чақирилиши ҳақидаги миш-мишлар рад этилди. Россиянинг Ўзбекистондаги элчихонаси маълум қилишича, интернетда тарқалган бундай хабарлар ҳақиқатга тўғри келмайди.
Изоҳ (0)