1998 йилда Шимолий Ирландиядаги низоларга ва Ирландия республика армияси томонидан мунтазам равишда амалга оширилган терактларга нуқта қўйган Белфаст битими имзоланганидан сўнг Буюк Британияда одамлар қурбон бўлишига олиб келган тўртта террорчилик ҳаракати бўлиб ўтди, деб ёзади «ТАСС».
2005 йил 7 июль куни Лондонда худкуш террорчилар тўртта портлашни амалга оширди — маҳаллий вақт билан 8:45 да метрополитеннинг учта поезди ҳужумга учради, 9:47 да Тависток-сквер майдонидаги шаҳар автобуси портлатиб юборилди. Натижада 52 киши ҳалок бўлди, 700 дан ортиқ киши жароҳатланди.
Худкушларнинг барчаси Бирлашган Қироллик фуқаролари бўлган, уларнинг уч нафари Буюк Британияда улғайиб, шу ерда таълим олган.
Терактлар текшируви натижаларига кўра, ҳеч ким судланмади. 2009 йил апрелида маслаҳатчилар суди жиноят ташкилотчиларининг шериклари деб гумон қилинаётган уч кишини оқлади.
2013 йил 22 майда Лондон жануби-шарқидаги Вулиж туманида британиялик ҳарбий хизматчи, Қироллик ўқчилар полки барабанчиси Ли Ригби ўлдириб кетилди. Британиянинг асли нигериялик икки фуқароси Ригбини автомобиль билан уриб кетди, сўнг пичоқлади. Иккаласи ҳам қотилликдан 20 дақиқа ўтиб, полиция томонидан қўлга олинди. Ҳодиса теракт деб баҳоланди, жиноятчиларни умрбод қамоқ жазосига маҳкум қилишди.
2017 йил 22 март куни Лондон марказида Вестминстер кўпригида террорчи бошқараётган автомобиль бир неча пиёдани уриб кетди. Сўнг ҳайдовчи машинани Британия парламенти ёнида қолдириб, полициячига пичоқ билан ташланди ва бинога кириб олишга уринди. Ҳужум қилган шахс отиб ташланди. Ҳодиса теракт деб баҳоланди. Беш киши ҳалок бўлди, 49 киши жабрланди.
2017 йил 22 май оқшомида Манчестер шаҳрида Ариана Гранденинг Manchester Arena ёпиқ стадионида ташкил этилган концерти вақтида портлаш юз берди. Полиция маълумотларига кўра, ҳодиса оқибатида камида 19 киши ҳалок бўлган, ўнлаб одамлар тан жароҳати олган.
Изоҳ (0)