Россия президенти Владимир Путин Қрим кўпригидаги портлаш муносабати билан тегишли вазирлар ва қўшиб олинган вилоятлар раҳбарлари билан очиқ йиғилиш ўтказди. Бу ҳақда Meduza хабар берди.
Путин йиғилишни очар экан, кўприкда хавфсизликни таъминлаш бўйича таклифлар кутаётганини айтди. У федерал хавфсизлик хизмати ва Тергов қўмитасига “нима бўлганини батафсил баён этиш”ни топширди.
Россия президенти, шунингдек, воқеани “Киев режимининг террорчилик ҳаракати” ва “маъносиз жиноят” деб атади ва Қрим кўпригидан ҳарбий транспорт учун “узоқ вақтдан бери фойдаланилмаётганини” қўшимча қилди.
“Албатта, Россиядан жавоб бўлади. Мудофаа вазирлиги тегишли таклифларни тайёрламоқда”, — деди Путин.
Бош вазир ўринбосари Марат Хуснуллин президентга жойларда вазият ҳақида гапирар экан, кўприк устунларига зарар етмаганини, бироқ автомобиль ўтадиган бир қисм вайрон бўлганини ва уни қайта тиклаш мумкин эмаслигини айтди.
Хуснуллиннинг айтишича, кун охиригача кўприкда тескари автомобиль ҳаракат қайта тикланади. Унга кўра, кўприкнинг бир томонида тўлиқ икки томонлама қатнов 15 сентябрдан, иккинчи томондан эса ноябрь ойидан йўлга қўйилиши режалаштирилган.
Қрим кўпригида портлаш
17 июль тонгда Қрим кўпригида портлаш содир бўлди, оқибатда йўлнинг бир қисми сувга тушиб кетди. Портлаш оқибатида икки нафар россиялик ҳалок бўлган.
Баъзи ОАВ манбаларга таяниб, бу Украина хавфсизлик хизмати (УХХ) ва Украина ҳарбий-денгиз кучлари томонидан амалга оширилган махсус операция бўлганини хабар қилди, бироқ УХХ кўприкдаги ушбу ҳужум тафсилотларига аниқлик киритмади.
Кремль муносабати
Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтди. У “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлишини таъкидлади.
“Биз бу теракт сабаблари ва унинг ортида кимлар турганини биламиз. Бу биздан янада совуққонлик, қўшимча чора-тадбирлар ва қўшимча меҳнат талаб қилади”, — деди Песков.
Изоҳ (0)