Украина хавфсизлик хизмати (УХХ) Американинг CNN телеканалига 2023 йил 17 июль куни Қрим кўпригига уюштирилган экспериментал денгиз дронининг ҳужуми видеосини топширди.
УХХ бошлиғи Василий Малюкнинг сўзларига кўра, кўприкни уриш учун 850 килограмм портловчи моддалар билан тўлдирилган Sea Baby дронидан фойдаланилган. У дронни Россиянинг Украинага кенг кўламли босқинидан сўнг бошланган бир неча ойлик ишланмалар натижаси деб атади.
УХХ телеканалга дрон операторининг экранида ёзиб олинган видеони берган, унда дроннинг кўприкка яқинлашаётгани тасвирланган. Бошқа видеокузатув камераларида дронлардан бири кўприкнинг йўл қисмига ҳужум қилгани, иккинчиси қарама-қарши томондаги темирйўл участкаси яқинида портлаганини кўриш мумкин.
УХХ раҳбари июль ойида кўприкка қилинган ҳужум кўп ойлик тайёргарлик натижаси эканини айтди. У 2022 йилнинг 8-октябрида Қрим кўпригига уюштирилган ҳужум учун жавобгарликни ҳам ўз зиммасига олди, аммо тафсилотларни айтишдан бош тортди. Унинг сўзларига кўра, сув юзасида ҳаракатланадиган дронлар УХХнинг “ноёб ихтироси” ҳисобланади.
“Сув усти дронлари — Украина Хавфсизлик хизматининг ноёб ихтироси. Хусусий компанияларнинг ҳеч бири бунга алоқадор эмас. Бу дронлар ёрдамида яқинда Қрим кўпригини, “Оленегорский Горняк” катта десант кемаси ва “SIG” танкерини муваффақиятли урдик.
“Биз Қора денгизда бир қатор янги қизиқарли операциялар устида ишлаяпмиз. Сизга ваъда бериб айтаманки, бу жуда ҳаяжонли бўлади, айниқса душманларимиз учун”, — деди УХХ раҳбари Малюк.
2023 йил 17 июлга ўтар кечаси Қрим кўпригида портлаш содир бўлди, унда ҳаракатланаётган машиналардан биридаги эр-хотин ҳалок бўлди, уларнинг 14 ёшли қизи яраланди. Россия Тергов қўмитаси террорчилик ҳаракати моддаси бўйича жиноий иш қўзғатди. Кўприкнинг автомобиль қисми шикастланди. Уни тиклаш, Россия расмийларига кўра, бир миллиард рублга тушади.
2022 йил 8-октябрь куни юк машинаси Қрим кўпригининг автомобиль қисмида портлаб кетганди. Шу билан бирга, Краснодар ўлкаси томон ҳаракатланаётган кўприкнинг темирйўл қисмида бўлган поездда еттита ёнилғи баки ёниб кетган.
Кўприкнинг иккита автомобиль қисми қулаб тушган, оқибатда тўрт киши ҳалок бўлган. Россия ҳодисани теракт деб баҳолаб, жиноий иш қўзғатган. Июль ойида Василий Малюк ўша портлашга УХХнинг алоқадорлигини билдириб ўтганди.
Изоҳ (0)