Қрим кўпригида портлашлар содир бўлди, деб ёзмоқда Россия ва Украина ОАВлари. Айни вақтда кўприкда ҳаракатланиш тўхтатилган, Краснодар ўлкасидан кўприкка кираверишда улкан тирбандлик юзага келган. Полиция юзлаб машиналарни ортга қайтарган.
База Telegram-канали кўприкнинг оралиқ қисмларидан бири қулаб тушгани ва дастлабки маълумотларга кўра, икки киши ҳалок бўлгани, яна бир киши жароҳатлангани ҳақида ёзмоқда.
Қрим раҳбари Сергей Аксёнов “Қрим кўпригида фавқулодда ҳолат юз берди”, дея хабар қилган. У “кўприк орқали ҳаракатланишдан тийилишга ва хавфсизлик нуқтаи назаридан янги ҳудудлар орқали муқобил йўлни танлашга” чақирган.
Эслатиб ўтамиз, 2022 йилнинг 8-октябрь куни юк машинаси Қрим кўпригининг автомобиль қисмида портлаб кетганди. Шу билан бирга, Краснодар ўлкаси томон ҳаракатланаётган кўприкнинг темирйўл қисмида бўлган поездда еттита ёнилғи баки ёниб кетган.
Кўприкнинг иккита автомобиль қисми қулаб тушган, оқибатда тўрт киши ҳалок бўлган. Россия ҳодисани теракт деб баҳолаб, жиноий иш қўзғатган.
Изоҳ (0)