«Осирис» зонди Бенну астероидидан олинган тупроқнинг бир қисмидан ажралди. Чунки аппарат кутилганидан кўп тупроқ тўплаган

Бир неча кун аввал Бенну астероидидан тупроқ йиғиб, Ерга юбормоқчи бўлган «Осирис» зонди намунанинг бир қисмидан ажралди, деб ёзади Meduza.

NASA маълумотларига кўра, «Осирис» астероид юзасидан кутилганидан анча кўпроқ (бир неча юз граммга кўпроқ) материал тўплаган, чунки аппарат астероидга яқинлашганида манипулятор қўл унинг юзасига чуқурроқ кирган. Шу туфайли контейнер қопқоғи маҳкам ёпилмаган ва тўпланган зарралар учиб чиқиб кетмоқда.

«Аслини олганда, биз ўз муваффақиятимизнинг қурбонига айландик», — дейди NASA олимлари.

Агентликнинг аниқлик киритишича, энди намуна солинган контейнер Ерга юборилиши учун унинг махсус герметик капсулага олиб ўтилишини тезлаштириш керак, чунки бу ҳозир қилиш мумкин бўлган ягона чора.

OSIRIS-REx космик зонди Бенну астероидига яқинлашиб, унинг тупроғидан намуна олгани ҳақида NASA ўз Twitter’ида маълум қилган эди.

OSIRIS-REx зонди 2016 йилнинг сентябрида Флорида штатидаги Канаверал саҳросидан учирилган. У Беннуга 2018 йилнинг декабрида яқинлашган ва кейинроқ астероид орбитасига чиқишга эришган. Зонд Ерга 2023 йилнинг сентябрида қайтиши ва тупроқ намуналарини олиб келиши керак.

Бенну — Ердан 320 миллион километр узоқликдаги қадимий астероид. Беннунинг айрим минерал намуналари Қуёш тизимидан ҳам катта бўлиши мумкин. Астероид диаметри 492 метрга тенг.

Беннуни тадқиқ этиш олимларга Қуёш тизимидан олдинги даврни ўрганиш ва Ерда ҳаёт қандай юзага келгани тўғрисида кўпроқ маълумотларга эга бўлишга ёрдам беради.