Ер аҳолиси ҳар 437 йилда бир учадиган кометани кўриши мумкин бўлади

Шимолий яримшар аҳолиси 2023 йил август ойида аниқланган Нишимура кометаси учишини кўриши мумкин. Бу ҳақда Тhе Guardian хабар берди.

Нишимура кометаси 17 сентябрь куни Қуёшга энг яқин масофага яқинлашади ва ундан 33 миллион километр узоқликда бўлади. Шундан сўнг у Ердан 125 миллион километр масофада учиб ўтади.

“Кометалар кашф этилгандан сўнг уларни дарҳол кўриш имконияти жуда кам ҳолларда учрайди. Уларнинг аксарияти бир ойда, ҳаттоки йиллар ўтиб Қуёшга яқинлашган пайт аниқланади”, — деди Париж расадхонаси астрофизиги Николай Бивер.

Олимларнинг қайд этишича, қулай об-ҳаво шароитида осмон жисмини техникаларсиз оддий кўз билан кўриш мумкин. Кометани “яшил думи” орқали аниқлаш мумкин, у чангдан кўра кўпроқ газни ўз ичига олгани сабабли шундай рангда бўлади.

“Энг яхшиси қуёш чиқишидан олдин Венеранинг шимоли-шарқий йўналишда осмонга қарашдир”, — деди Бивер.

Илмий равишда C/2023 P1 номини олган Нишимура кометаси 11 август куни кашф этилиб, уни аниқлаган япон астрономи Хидео Нишимура шарафига номланган.

Кейинги сафар Ер аҳолиси кометани фақат 437 йилдан кўпроқ вақт ичида кўра олиши таъкидланмоқда.