Ўзбекистонда судларда сунъий интеллектдан фойдаланилади

Судлар фаолиятида сунъий интеллект технологиялари жорий этилади. Бу ҳақда Адлия вазирлиги хабар берди. 

Унга кўра, президентнинг “Судлар фаолиятига сунъий интеллект технологияларини жорий этиш орқали одил судловга эришиш даражасини ошириш ҳамда суд тизимининг моддий-техник таъминотини яхшилашга доир қўшимча чора-тадбирлар тўғрисида”ги фармони қабул қилинди. Фармонга асосан судлар фаолиятига сунъий интеллект технологияларини жорий этиш ҳамда рақамлаштириш жараёнларини жадаллаштиришнинг устувор мақсадлари этиб қуйидагилар белгиланди:

• суд ишларини юритишда қоғоз шаклидан воз кечиш мақсадида “Рақамли суд” концепцияси асосида ишларнинг юритилишини босқичма-босқич тўлиқ электрон шаклга ўтказиш;
• судлар фаолиятига сунъий интеллект технологияларини жорий этиш учун зарур техник инфратузилма яратиш;
• Олий суднинг ахборот тизимлари негизида суд ҳужжатлари архиви модулини ишлаб чиқиш ва амалиётга жорий этиш;
• судлар фаолиятини рақамлаштириш бўйича “Кибер ҳуқуқ” йўналишида илмий тадқиқотлар ўтказиш, шунингдек, судьялар ва суд аппарати ходимларининг рақамли саводхонлиги ва малакасини доимий ошириб бориш.

Шунингдек, “Рақамли суд” концепциясини амалга ошириш доирасида қуйидаги ишлар бажарилади:

• судга ариза беришдан олдин сунъий интеллект ёрдамида суд муҳокамасининг тахминий натижаси ва сарфланадиган харажатлар шакллантирилади;
• мурожаатлар судга электрон шаклда юборилади;
• суд ҳужжатлари лойиҳалари автоматик тарзда шакллантирилади.

Бу ҳақда 21 август куни президент Шавкат Мирзиёевга қилинган тақдимотда муҳокама қилинган эди. Тақдимотда маъмурий ва иқтисодий суд ишларини экстерриториал тарзда кўриш тартибини жорий этиш масаласи кўрилган. Судьяликка тайинлаш муддатларини қайта кўриб чиқилиши айтилган.

Мулоқотда Судьялар олий мактаби негизида Одил судлов академиясини ташкил этиш концепцияси тақдим қилинган. Давлат раҳбари билдирилган таклифларни маъқуллаб, тегишли фармонларни имзолаган.

Аввалроқ собиқ ташқи ишлар вазири, айни пайтда Марказий Осиё сунъий идрок ассоциацияси раиси Владимир Норов “Дарё” мухбирига берган интервьюсида Ўзбекистон суд тизимида сунъий интеллектдан фойдаланиш тезроқ йўлга қўйилиши кераклигини айтганди.