Мадриднинг “Реал” клуби ярим ҳимоячиси Дани Себальос фаолиятини Франция чемпионатида давом эттириши мумкин. Бу ҳақда инсайдер Фабрицио Романо ўзининг Х (собиқ Twitter) тармоғидаги саҳифасида хабар берди.
Унга кўра, “Марсель” Себальосни ўз сафига қўшиб олиш учун жиддий ҳаракат бошлаган. Клуб раҳбарияти жамоанинг ярим ҳимоя чизиғини кучайтиришни режалаштирган ва испаниялик футболчи ушбу позиция учун асосий номзодларидан бири ҳисобланади.
“Реал” ва “Марсель” ўртасида дастлабки музокаралар ўтказилгани айтилмоқда. Романонинг қўшимча қилишича, келишув осон бўлмаслиги мумкин, бироқ “Марсель” Себальосни 2026 йил ёзида сотиб олиш шарти билан ижарага олиш ниятида.
Себальос 24 август, якшанба куни ўтказилган “Оведо”га қарши ўйиндан сўнг ўзининг Instagram саҳифасида “Реал”ни тарк этиши ҳақида пост жойлаган, аммо кейинчалик уни ўчириб ташлаган. Футболчи клубни тарк этишни истамоқда, чунки у Хаби Алонсо бошчилигидаги жамоанинг асосий ўйинчиларидан бири эмас. Шу сабабли Себальос клубдан кетишга қарор қилган.
Аввалроқ Себальосга Испания Ла Лигасининг бошқа бир жамоаси — “Бетис” ҳам қизиқиш билдирган эди. Аммо Андалусия клуби футболчи учун белгиланган суммани тўлай олмади ва трансфердан воз кечган.
- Дани Себальос 2017 йилдан бери “Реал” шарафини ҳимоя қилиб келади.
- Унинг клуб билан шартномаси 2027 йилнинг ёзига қадар амал қилади.
- Transfermarkt портали ярим ҳимоячининг қийматини 10 миллион еврога баҳолаган.
Изоҳ (0)