АҚШ Миллий аэронавтика ва фазони тадқиқ қилиш бошқармаси (NASA) Voyager-2 сайёралараро зонд билан алоқа узилиб қолганини хабар қилди, деб ёзмоқда “Интерфакс”.
“21 июль куни NASA томонидан Voyager-2 космик аппаратига юборилган бир қатор буйруқлар жавобсиз қолди. Бунга аппарат антеннасининг Ердан 2 даражага силжиши сабаб бўлди. Оқибатда ҳозир Voyager-2 буйруқларни қабул қилолмайди ва Ерга маълумотларни узатолмайди”, — дейилади хабарда.
NASA маълумотларига кўра, зонд Ердан 19,9 миллиард километр узоқликда учмоқда ва антеннанинг силжиши туфайли Deep Space Network (DSN) ерусти антенналари билан боғлана олмаяпти.
Ҳисоботда қайд этилишича, Voyager-2 антеннаси йўналишини Ерга мос равишда сақлаб қолиш учун фазодаги йўналишини бир неча марта ўзгартиришга дастурлаштирилган. Навбатдаги ўзгартириш 15-октябрда амалга ошади, мутахассислар ўшанда алоқа тикланишини кутмоқда.
- Voyager-1 зонди ва унинг “эгизак укаси” Voyager-2 1977 йилда узоқ фазо ва қуёш тизимининг асосий сайёраларини ўрганиш учун учирилган эди.
- Уларнинг режалаштирилган фаолият муддати аллақачон тугаган бўлса-да, аппаратлар юлдузлараро фазо ҳақида маълумот тўплаш ва Ерга узатишда давом этмоқда.
Изоҳ (0)