2022 йилнинг декабрь ойида NАSAнинг Maven миссияси қуёш шамоли деб номланувчи Қуёшдан доимий равишда келиб чиқадиган зарядланган зарралар оқимининг тўсатдан “йўқолиши”ни кузатди. Космосда бўшлиқ қолдирган ушбу камёб қуёш ҳодисаси Марс атмосферасининг “деярли ақл бовар қилмайдиган” кенгайишига олиб келди, деб ёзади Independent.
Сан-Франсискодаги Америка геофизика иттифоқининг кузги йиғилишида тақдим этилган NАSA кузатувларига кўра, қуёш шамоли босимисиз Марс атмосфераси ва магнитосфераси минглаб километрларга кенгайган.
Олдинги тадқиқотлар шуни кўрсатдики, Марс ҳам Қуёш тизимидаги бошқа сайёралар сингари, доимий равишда Қуёшдан чиқадиган зарядланган зарралар билан ўралган бўлиб, у магнитосферага ўз босимини ўтказади.
Шу билан бирга, Марсга тушган қуёш шамоли унинг атмосферасининг кўп қисмини тарқатиб юборади. Шундай қилиб, 2022 йил декабрь ойида қуёш шамолининг зичлиги 100 баравар пасайди, бу эса Марсда босимнинг пасайишига ва сайёра магнитосфераси ҳажмининг уч баравардан ошишига олиб келди.
Тадқиқотчиларнинг таъкидлашича, ушбу қуёш ҳодисаси ва Марс магнитосферасининг кейинги ўзгариши Марсда сув ва атмосферанинг йўқолишига олиб келган физикани яхшироқ тушунишга ёрдам беради. Қуёш шамолининг бундай кескин йўқолиши жуда камдан-кам ҳолларда ва фақат қуёш фаоллиги кучайган пайтда содир бўлиши айтилмоқда.
Изоҳ (0)