Тошкент шаҳар давлат солиқ хизмати органлари ходимлари томонидан яширин фаолият юритишни чеклаш, ноқонуний ҳатти-ҳаракатларга барҳам бериш ҳамда солиқларни ўз вақтида тўлаб келаётган инсофли тадбиркорларни рағбатлантириш мақсадида профиликтик тадбирлар ўтказилмоқда. Бу ҳақда Тошкент шаҳар ДСБ Жамоатчилик билан алоқалар ва ҳуқуқий ахборот шўъбаси хабар берди.
Жумладан, Тошкентнинг Олмазор тумани, Фаробий кўчаси, 426-уйда фуқаро Бегали Турғунов (исм фамилиялар ўзгартирилган) 80 турдаги умумий қиймати 1 миллиард сўмдан зиёд 1858 дона гилам маҳсулотларини ҳеч қандай ҳужжатларсиз, ноқонуний равишда савдога қўйганлиги аниқланган.
Ушбу савдо дўконидаги ўтказилган назорат тадбирида «уддабурон тадбиркор» маҳсулотларнинг кирим ҳужжатлари ва тадбиркорлик фаолияти билан шуғулланиш учун рухсатномалари бўлмаган.
Профиликтик тадбирлар давомида яна бир фуқаро Олмазор тумани, Қора-Қамиш 2/4 даҳаси, Юнусова кўчасида давлат рўйхатидан ўтмасдан яширин цех ташкил этиб, эркаклар пояфзали ишлаб чиқариш фаолияти билан шуғулланиб келаётганлиги аниқланди. Энг ачинарлиси, ёнғин хавфсизлиги, тиббий гигиеник қоидаларга зид равишда фаолият юритаётган ушбу корхонада 20 нафарга яқин фуқаро норасмий равишда ёлланиб, ишлаб келаётгани маълум бўлган.
Назорат тадбири давомида фаолиятини бошлаб, аммо тадбиркор сифатида рўйхатдан ўтмаган ушбу фуқароларга рўйхатдан ўтиш тартиби, солиқ тўловлари, ноқонуний тадбиркорликнинг салбий оқибатлари ҳамда қонуний фаолият юритишнинг афзалликлари батафсил тушунтирилди. Шундан сўнг улар солиқ идоралари ҳам амалий ҳам ҳуқуқий кўмаги билан тадбиркор сифатида рўйхатдан ўтди.
Тошкент шаҳар давлат солиқ хизмати органлари томонидан бу каби профилактик тадбирлар давом этади.
Изоҳ (0)