Тошкент вилоятида 24 ёшли ишчининг оёғини пахта титиш ускунаси тортиб кетди

Тошкент вилояти Янгийўл туманида пахта титиш учун мўлжалланган ускуна 24 ёшли ишчининг ўнг оёғини тортиб кетди, деб хабар беради Тергов департаменти.

Маълум қилинишича, 16 апрель куни соат 15:30 ларда туманнинг «Қирсадоқ» маҳалласи ҳудудида жойлашган қоғоз ишлаб чиқариш цехида ишловчи 24 ёшли Т.Улуғбек пахта титиш учун мўлжалланган «Шнег» русумли ускунада хавфсизлик қоидаларига риоя қилган ҳолда ишлаётган вақтида, ускуна унинг ўнг оёғини тортиб кетган.

Суд тиббий экспертизасида фуқаро Т.Улуғбек оғир тан жароҳатлари олгани кўрсатилган.

Олиб борилган терговга қадар текширув ҳаракатлари жараёнида мазкур цех раҳбарлари ва масъул смена бошлиқлари томонидан техник қоидалар бузилгани, ушбу ускунада ишлаш учун етарли хавфсизлик чоралари кўрилмагани, хавфсизлик талаблари бузилгани аниқланган.

Мазкур ҳолат юзасидан Янгийўл тумани ИИБ ҳузуридаги Тергов бўлими томонидан Жиноят кодексининг 257-моддаси 1-қисми (меҳнатни муҳофаза қилиш қоидаларини бузиш) билан жиноят иши қўзғатилиб, тегишли экспертизалар тайинланган.

Ҳозирда тергов давом этмоқда.