Фарғона вилояти Учкўприк туманида қурилиши тугалланмаган цехда ёнғин содир бўлди.
ФВВ матбуот хизматининг хабар қилишича, 19 июнь куни соат 12:42 да қурилиши тугалланмаган калава ип ва рангли ип ишлаб чиқариш цехида содир бўлаётгани тўғрисида хабар тушган.
Шунга кўра 4 та ёнғин-қутқарув экипажи соат 12:45 да воқеа жойига етиб бориб, ёнғин соат 12:48 да ўраб олинган ва соат 13:02 да ўчирилган.
Ёнғин натижасида цех биносининг 150 квадрат метр майдонида том қисми, оператор ва қоровул хонасининг ички қисми ёниб зарарланган. Ёнғиндан бинонинг 2 000 квадрат метр майдони сақлаб қолинган.
Ҳодиса оқибатида тан жароҳати олган ва ҳалок бўлганлар йўқ. Ёнғин сабаби ва зарар миқдори аниқланмоқда.
Бундан бир неча кун аввал Фарғона вилоятининг Қўқон шаҳридаги савдо комплексида ёнғин содир бўлганди. Ушбу йирик ёнғин 10 та ёнғин-қутқарув экипажи ёрдамида бартараф этилган. Ҳолат юзасидан жиноят иши қўзғатилган. Вилоят ҳокимлиги ёниб кетган дўконлар 15 кунда қайта қуриб берилишини маълум қилди. Қурилиш ишлари учун тадбиркорлардан умуман пул олинмайди. Барча ишлар бозор маъмурияти ҳисобидан амалга оширилади.
Изоҳ (0)