Тошкентнинг Бектемир туманида жойлашган Techno Continental МЧЖнинг металлни қайта ишлаш цехи ишчиси чап қўл бармоқларини кесиб олди.
ИИВ ҳузуридаги Тергов департаментининг хабар беришича, воқеа 1 февраль куни соат 06:30 ларда юз берган. Ушбу корхонада ишловчи 23 ёшли М.Й. металл кесиш учун мўлжалланган дастгоҳда хавфсизлик қоидаларига риоя қилган ҳолда ишлаётган вақтида чап қўл бармоқларини кесиб олган.
Олиб борилган терговга қадар текширув ҳаракатлари жараёнида Techno Continental МЧЖ мансабдор шахслари томонидан техник қоидалар бузилганлиги, ушбу дастгоҳда ишлаш учун етарли хавфсизлик чоралари кўрилмаганлиги аниқланган.
Суд тиббий экспертизасида ишчи оғир тан жароҳатлари олганлиги кўрсатилган.
Ҳолат юзасидан Бектемир тумани бўйича ИИО ФМБ ҳузуридаги тергов бўлинмаси томонидан Techno Continental МЧЖ мансабдор шахсларига нисбатан Жиноят кодексининг 257-моддаси 1-қисми (меҳнатни муҳофаза қилиш қоидаларини бузиш) билан жиноят иши қўзғатилиб, тегишли экспертизалар тайинланган. Ҳозирда тергов давом этмоқда.
Корхоналар ва ташкилотларнинг ягона давлат реестри маълумотларига кўра, Techno Continental 2018 йилнинг январида рўйхатдан ўтган бўлиб, корхона электромаиший қурилмаларни ишлаб чиқариш билан шуғулланади. Корхона муассиси — Artel Electronics (62,5 фоиз) ва Ilk Sabah Insaat Anonim Sirketi (37,5 фоиз).
2020 йилнинг ноябрида Яшнобод туманида жойлашган корхонада ёнғин чиқиб, бир неча киши жароҳат олганди.
Изоҳ (0)