Farg‘ona shahridagi sexda sodir bo‘lgan yong‘in oqibatida bir kishi halok bo‘ldi. Bu haqda viloyat FVB matbuot xizmati xabar berdi.
21-dekabr kuni soat 14:13 da Farg‘ona shahar “Mustaqillik” MFY Kimyogar ko‘chasida joylashgan solidor va litol ishlab chiqarish sexida yong‘in sodir bo‘layotgani yuzasidan xabar kelib tushgan.
Yong‘in qutqaruvchilar hodisa joyiga 14:21 da yetib borgan va yong‘in 14:24 da o‘rab olinib, 14:32 da batamom o‘chirilgan.
Yong‘in oqibatida bir kishi voqea joyida vafot etgan. Hozirda yong‘inning kelib chiqishi sababi va zarari aniqlanmoqda.
Bundan bir necha kun avval Farg‘ona shahridagi zapravkada portlash va yong‘in sodir bo‘lgandi. Suyultirilgan gaz to‘kish vaqtida texnologik jarayonlarning buzilishi hamda texnika xavfsizligi qoidalariga rioya qilinmasligi oqibatida chaqnash sodir bo‘lgan, undan so‘ng yong‘in yuzaga kelgan. Buning oqibatida dastlab bir nafar fuqaro vafot etgani, to‘rt nafar fuqaro tan jarohati olgan, sakkiz nafar fuqaro tibbiyot xodimlari nazoratida ekani ma’lum qilindi. Keyinroq yana 3 kishi shifoxonada vafot etdi. Holat yuzasidan jioyat ishi qo‘zg‘atilib, 5 kishi qamoqqa olingan. Hodisadan keyin hokim qarori bilan viloyatdagi barcha zapravkalarning belgilangan norma va me’yorlarga muvofiqligi holatini o‘rganib chiqish topshirildi.
Izoh (0)