Буюк Британия Мудофаа вазирлиги ҳарбийларни тайёрлашда ёрдам бериш учун Украинага ўз қўшинларини юбориш имкониятини кўриб чиқмоқда.
Бир кун аввал 18 декабрь куни Британия мудофаа вазири Жон Хили Киевга келиб, Украина мудофаа вазири Рустем Умеров билан учрашди. Уларнинг учрашуви тафсилотлари ошкор қилинмаяпти, бироқ томонлар янги йилда Украинага кўпроқ ёрдам кўрсатиш имкониятларини муҳокама қилгани маълум.
“Украина бўйича қўшма режамиз тафсилотлари президент Путин учун очиқ бўлмаслиги керак”, деди Жон Хили BBCга.
Бугун 19 декабрь куни Британия Украинага 225 миллион фунт стерлинглик янги ёрдам пакети ажратиши эълон қилинди. Бу маблағлар биринчи навбатда дронлар, артиллерия снарядлари ва ҳаво мудофаа тизимлари сонини кўпайтиришга мўлжалланган.
Британияликлар украиналик аскарларни 2022 йилдан бери қайта тайёрламоқда, бироқ ўз ҳудудида. Эндиликда машғулотлар Украинада ўтказилиши режалаштирилмоқда.
Британия урушни имкон қадар тезроқ тугатишга қайта-қайта ваъда берган Дональд Трамп Оқ уйда ўз лавозимига киришгунга қадар Украинанинг энг кучли позицияда бўлишини таъминлаш йўлларини қидирмоқда.
Буюк Британия ва Украина мудофаа вазирлари ўртасидаги учрашув бугун 19 декабрь куни Брюсселда Буюк Британия ташқи ишлар вазири Девид Лемми, Украина президенти Владимир Зеленский ҳамда Европа Иттифоқи ва НАТО расмийлари иштирокидаги учрашув олдидан бўлиб ўтди.
Девид Лемми Украина учун қўшимча ёрдам зарурлигини айтди.
“Европа бўйлаб иттифоқчилар Украинага кўрсатаётган қўллаб-қувватлашни, уларнинг қуролли кучлари учун зарур бўлган таълимни, ажратиладиган ёрдамни кучайтириши жуда муҳим ва биз буни молиялаштириш йўлларини топишимиз керак”, - деди у.
Кеча 18 декабрь куни Украинадаги вазиятни Буюк Британия бош вазири Кей Стармер Дональд Трамп билан телефон суҳбатида муҳокама қилган.
Стармер Оқ уйнинг бўлажак раҳбарига иттифоқчилар Украинани можаро якунлангунига қадар қўллаб-қувватлаши кераклигини айтди.
Изоҳ (0)