Украинага қарши жанглар учун Россияга юборилган Шимолий Корея ҳарбийлари орасида 200 дан ортиқ қурбонлар қайд этилди. Бу ҳақда Украина Миллий хавфсизлик ва мудофаа кенгаши ҳузуридаги Дезинформацияга қарши кураш маркази раҳбари Андрей Коваленко ўзининг Telegram каналида маълум қилди.
КХДР ҳарбийлари орасида ҳалок бўлганлар ва ярадорлар сони тобора ортмоқда. Ҳозирги вақтда ўлганлар ва жароҳатланганларнинг умумий сони 200 кишидан ошиб кетди. Россияликлар корейсларнинг муваффақиятсизликларини яшириш учун уларни жанг майдонидан тезроқ эвакуация қилишга ҳаракат қиляпти. Бироқ Шимолий Корея ҳарбийларига зарбалар, уларнинг муваффақиятсизликлари ва жасадлари акс этган видеолар тарқалмоқда. Шунингдек, тармоқда шифохоналардан олинган кадрлар ҳам пайдо бўлди, деган расмий.
Коваленкога кўра, Россия Шимолий Корея аскарлари ҳаётини қадрламайди. Шу боис улардан фронт олдида “тирик қалқон” сифатида фойдаланмоқда.
Россия ҳамда Шимолий Корея ўртасида ҳарбий ҳамкорлик алоқалари кучайиб бормоқда. Муносабатлар, айниқса, икки давлат кенг қамровли стратегик шериклик тўғрисидаги шартномани ратификация қилгандан сўнг янада ривожланди.
Пхеньян ўз иттифоқчисини артиллерия снарядлари, узоқ масофага ўт очиш тизимлари ва ҳарбий контингент билан таъминлаб келмоқда. Аввалроқ Шимолий Корея Россиядан бунинг эвазига нималар олиши хабар қилинганди. Россия қўмондонлиги корейс аскарларидан Курск йўналишидаги ялпи ҳужумларда фойдалана бошлади.
Бироқ улар тил билмаслик ва ўзаро мувофиқлик йўқлиги каби муаммоларга дуч келмоқда. Аввалроқ бу “дўстона ўт очиш” ҳолатларига сабаб бўлгани хабар қилинганди.
Изоҳ (0)