Атом энергияси бўйича халқаро агентлик (МАГАТЭ) Киевнинг сўрови билан текширув ўтказиш учун яқин кунларда Украинанинг иккита ядро объектига ўз инспекторларини юборади. Бу ҳақда ташкилот бош директори Рафаэл Гросси маълум қилди.
Унинг айтишича, иккала объектга ҳам МАГАТЭ ходимлари мунтазам бориб туради, бу сафар инспекция яширин ядро фаолияти ва материаллари бор-йўқлигини текширишга тааллуқли бўлади.
«Бир ой аввал МАГАТЭ бу жойлардан бирини текширувдан ўтказганди, ва бизнинг барча хулосаларимиз Украинанинг хавфсизлик бўйича вазият ҳақидаги декларациялари билан мувофиқ келади… У ерда ҳеч қандай махфий ядровий фаолият ва материаллар аниқланмаган», — дея қўшиб қўйди Гросси.
АҚШ МАГАТЭнинг текширув ўтказиш ҳақидаги қарорини қўллаб-қувватлайди, деди Оқ уй вакили Карин Жан-Пьер.
«Ифлос бомба» атрофидаги можаро
24 октябрь куни Россия томони Украинадаги иккита ташкилотга «ифлос бомба» яратиш бўйича аниқ топшириқлар берилгани, ишлар якуний босқичда турганини маълум қилди. Россия Қуролли кучлари радиациявий, кимёвий ва биологик ҳимоя қўшинлари бошлиғи генерал-лейтенант Игорь Кириллов сўзларига кўра, Украина ўз АЭСларида, кончилик корхоналарида «ифлос бомба» учун хом ашёга эга, бундан ташқари, Киев ва Харьковда илмий базаси ҳам бор.Шундан кейин Украина Ташқи ишлар вазирлиги МАГАТЭга мамлакатга ўз инспекциясини юборишни таклиф қилди. «Яширадиган ҳеч нарсамиз йўқ», — деди вазир Дмитрий Кулеба.
23 октябрь куни мудофаа вазири Сергей Шойгу НАТОнинг тўртта давлатидаги ҳамкасблари билан боғланиб, Украина «ифлос бомба» ёрдамида «провокация»ни режалаштираётганини айтди. Украина «ифлос бомба» ҳақидаги хабарларни ёлғон деб атади. Президент Владимир Зеленский Украинада бундай бомбадан фақат Россия фойдаланиши мумкинлигини айтди.
Ғарб давлатлари фикрича, Россиянинг «ифлос бомба» ҳақидаги огоҳлантиришлари янги эскалация учун баҳона. «Украина ўз ҳудудида ифлос бомба қўллашга тайёрланаётгани ҳақидаги Россиянинг очиқдан очиқ ёлғон даъволарини барчамиз рад этамиз», — дейилади Франция, Буюк Британия ва АҚШ ташқи ишлар вазирлари қўшма баёнотида.
«Ифлос бомба» — радиоактив моддалардан таркиб топган, бироқ оддий портловчи моддага асосланган, яъни мустақил ядровий реакцияга қодир бўлмаган фаразий портловчи қурилма. «Ифлос бомба» одатда террористик ҳужумнинг эҳтимолий турларидан бири деб ҳисобланилади.
Мавзуга доир:
- «Киев ‘ифлос бомбаъдан фойдаланмоқчи эмас» — НАТО бош котиби Россиянинг иддаоларини бемаънилик деб атади
- Россия Бош штаби раҳбари «ифлос бомба» туфайли АҚШ ва Британия ҳарбий амалдорларига қўнғироқ қилди
- Шойгунинг НАТО мудофаа вазирларига қўнғироқ қилишдан мақсади Украинага ёрдамни тўхтатиб қўйиш бўлган
Изоҳ (0)