Россия расмийларининг Киев «ифлос бомба» яратаётгани ҳақидаги даъволаридан сўнг, Атом энергияси бўйича халқаро агентлик — МАГАТЭ Украинадаги учта ядровий иншоотни текширди. Текширув ўтказилган жойларда ҳеч қандай яширин ядровий фаоллик белгилари топилмади, дейилади МАГАТЭ баёнотида.
«МАГАТЭ инспекторлари Украина ҳукуматининг сўровига биноан мамлакатнинг учта жойида олиб борилган текширув ишларини якунлади. Текширув жараёнида яширин ядровий фаолият ва материаллар ҳақида ҳеч қандай далил топилмади», — дейилади агентлик хабарида.
«Ифлос бомба» атрофидаги можаро
24 октябрь куни Россия томони Украинадаги иккита ташкилотга «ифлос бомба» яратиш бўйича аниқ топшириқлар берилгани, ишлар якуний босқичда турганини маълум қилди. Россия Қуролли кучлари радиациявий, кимёвий ва биологик ҳимоя қўшинлари бошлиғи генерал-лейтенант Игорь Кириллов сўзларига кўра, Украина ўз АЭСларида, кончилик корхоналарида «ифлос бомба» учун хом ашёга эга, бундан ташқари, Киев ва Харьковда илмий базаси ҳам бор.
Шундан кейин Украина Ташқи ишлар вазирлиги МАГАТЭга мамлакатга ўз инспекциясини юборишни таклиф қилди. «Яширадиган ҳеч нарсамиз йўқ», — деди вазир Дмитрий Кулеба.
23 октябрь куни мудофаа вазири Сергей Шойгу НАТОнинг тўртта давлатидаги ҳамкасблари билан боғланиб, Украина «ифлос бомба» ёрдамида «провокация»ни режалаштираётганини айтди. Украина «ифлос бомба» ҳақидаги хабарларни ёлғон деб атади. Президент Владимир Зеленский Украинада бундай бомбадан фақат Россия фойдаланиши мумкинлигини айтди.
Ғарб давлатлари фикрича, Россиянинг «ифлос бомба» ҳақидаги огоҳлантиришлари янги эскалация учун баҳона. «Украина ўз ҳудудида ифлос бомба қўллашга тайёрланаётгани ҳақидаги Россиянинг очиқдан очиқ ёлғон даъволарини барчамиз рад этамиз», — дейилади Франция, Буюк Британия ва АҚШ ташқи ишлар вазирлари қўшма баёнотида.
«Ифлос бомба» — радиоактив моддалардан таркиб топган, бироқ оддий портловчи моддага асосланган, яъни мустақил ядровий реакцияга қодир бўлмаган фаразий портловчи қурилма. «Ифлос бомба» одатда террористик ҳужумнинг эҳтимолий турларидан бири деб ҳисобланилади.
Изоҳ (0)