Украина, Озарбайжон ва Ўзбекистондаги Пентагонга тегишли бўлган лабораторияларда қайта таъмирлаш амалга оширилмоқда, деб хабар қилди Sputnik «РИА Новости»га таяниб. Бу ҳақда Россия Қуролли кучларининг радиация, кимё ва биологик ҳимоя қўшинлари бошлиғи Игорь Кириллов маълум қилди.
«Лугар маркази АҚШнинг йирик ҳарбий-биологик дастурининг бир қисмидир. Дастур доирасида Россия атрофида жойлашган мамлакатларда Пентагонга таалуқли бўлган бир неча марказлар фаолият юритмоқда. Украина, Озарбайжон ва Ўзбекистондаги Пентагонга тегишли бўлган лабораторияларда қайта таъмирлаш амалга оширилмоқда», — деди Кириллов.
Россиялик ҳарбий айтишига қараганда, Лугар марказлари фаолиятининг асосий мақсади инфекцион касалликлар ҳақида барча маълумотни тўплаш, патоген микроорганизмларнинг миллий коллекциялари штаммларини, жумладан вакцина ва антибиотикларга бардош берувчи штаммларни ҳам олиб чиқиб кетишдир.
Ўзбекистон Мудофаа вазирлигида Петагонга тегишли бўлган лабораторияларда ҳеч қандай қайта таъмирлаш ишлари ҳақида эшитмаганликларини хабар қилишди.
Эслатиб ўтамиз, бир неча кун олдин Грузия Давлат хавфсизлиги собиқ вазири Игорь Гиоргадзе Москвада, матбуот анжумани чоғида АҚШ президенти Дональд Трампга Грузияда фаолият юритаётган Лугар Маркази фаолиятини текширишни сўраб мурожаат қилганини хабар қилди.
Гиоргадзе журналистларга Грузиядаги Лугар Марказига тегишли бўлган тиббиёт марказида 2015 йилнинг декабрь ойида 30 киши, 2016 йилнинг августида 16 киши вафот этганини хабар қилди. Беморларнинг барчаси гепатит C дан даволаш учун ушбу тиббиёт марказларига ётқизилган бўлган. Лаборатория эълон қилган ҳисоботларда ушбу беморларнинг исм-шарифлари кўрсатилмаган, фақат ёши ва жинси кўрсатилган.
Изоҳ (0)