Тошкент шаҳрида 26 июнь — Халқаро гиёҳвандликка қарши курашиш куни муносабати билан ноқонуний муомаладан олинган наркотик моддаларни йўқ қилиш тадбири ўтказилди. Бу ҳақда “Дарё” мухбири хабар берди.
Давлат хавфсизлик хизмати томонидан ташкил этилган тадбирда мутасадди идоралар ходимлари, халқаро ташкилотлар, дипломатик корпус, жамоатчилик ва ОАВ вакиллари қатнашди.
Тадбирда 2 тонна 158 кг гиёҳвандлик воситалари иштирокчилар кўз ўнгида, махсус печда ёқиб юборилди.
Республика ҳуқуқни муҳофаза қилиш идоралари томонидан 2023 йилда гиёҳвандлик воситаларининг ноқонуний муомаласи билан боғлиқ 10 039 та (2022 йил мос давридагидан 15,5 фоиз кўп) ҳолат аниқланган. Шундан 10 011 тасида жиноий иш қўзғатилган, 28 тасида маъмурий чоралар қўлланилган.
Жиноий ишларнинг 3 122 таси наркотик моддаларни ўтказиш, 399 таси контрабанда, 1 705 таси таркибида гиёҳвандлик воситалари мавжуд бўлган ўсимликларини етиштириш билан боғлиқ.
Республикада гиёҳвандлик воситаларининг ноқонуний муомаласидан 2023 йилда жами 10,4 тонна миқдордаги наркотик моддалар мусодара қилинган. Шундан қарийб 82,7 фоизи кўкнор бўлган.
Маълумотларга кўра, Ўзбекистонга афғон наркотиклари асосан, Тожикистон ва Қирғизистон орқали жанубий–шарқдан – Самарқанд ва Сирдарё вилоятларига, шимолий–шарқдан – Фарғона водийси вилоятлари, Тошкент вилояти ҳамда тўғридан–тўғри Афғонистондан Амударё дарёси орқали Сурхондарё вилоятига олиб кирилиши кузатилмоқда.
2023 йил давомида Ўзбекистон Республикаси ҳудудида гиёҳвандлик воситалари, психотроп моддалар ва прекурсорларнинг ноқонуний муомаласи билан боғлиқ жиноятлар содир этганлиги учун 94 та холатлар бўйича хорижий давлатларнинг 101 нафар фуқароси ушланган.
Тадбирда наркожиноят содир этганлик ҳолати билан судланганлар орасида ёшлар улуши тобора ортиб бораётгани айтилди. Масалан, 2018 йилда жами наркожиноятларнинг 19,1 фоизи (3691 тадан 705 таси) ёшлар томонидан содир этилган. Бу рақамлар 2019 йилда 22,6 фоизга (3472 тадан 784 та), 2020 йилда 24,8 фоизга (3977 тадан 987 та) чиққан. 2021 йилда наркожиноятлар бўйича кўриб чиқилган 4254 та жиноят ишидан 920 таси ёшларга (21,6 фоиз) тегишли бўлган.
2022 йилда бу кўрсаткич 25,3 фоизни (4254 тадан 920 та) ташкил этган. 2023 йилга келиб рақамлар янада ўсган ва 28,1 фоизга (6264 тадан 1758 та) етган. Хусусан, мазкур йўналишда қўзғатилган энг кўп жиноят ишлари Тошкент шаҳрида қайд этилган ва 55,5 фоизни (1309 тадан 727 та) ташкил этган. Бу дегани шаҳарда наркотик моддалар билан боғлиқ жиноятларнинг ҳар иккинчиси ёшлар томонидан содир этилмоқда.
Маълумот учун, Ўзбекистон 1995 йил февралда БМТ гиёҳвандлик воситалари ва психотроп моддалар ноқонуний муомаласига қарши кураш бўйича конвенцияларига қўшилган. 1999 йил 19 август куни мамлакатда “Гиёҳвандлик воситалари ва психотроп моддалар тўғрисида”ги қонун қабул қилинган. 2024 йилда гиёҳвандлик ва наркожиноятларга қарши курашиш бўйича 2024–2028 йилларга мўлжалланган “Миллий стратегия” ишлаб чиқилди.
Изоҳ (0)