Қирғизистон президенти Жўқорғи Кенеш йиғилишида собиқ вазирлар маҳкамаси раҳбари Оқилбек Жапаровни нега лавозимидан четлатганига изоҳ берди. Бу ҳақда 24.кг хабар берди.
Президентга кўра, бу давлат солиқ хизмати (ДSX) раҳбарияти ва ходимларига нисбатан жиноят ишини кўриб чиқишда манфаатлар тўқнашуви бўлмаслиги учун қилинган.
Солиқ тизимидаги салбий ҳолатлар бизни қаттиқ хафа қилди. Акциз маркалари билан боғлиқ фирибгарликлар маълум бўлиб қолди. Бу соҳа Оқилбек Усенбекович назорати остида эди, шунга кўра ноқонуний ҳаракатларни тўхтатиш мумкин эди. Манфаатлар тўқнашувини бартараф этиш мақсадида ДSX раҳбариятига нисбатан тергов қилинаётган жиноят иши юзасидан уни лавозимидан четлатишга мажбур бўлдим, деди Садир Жапаров.
Оқилбек Жапаров 16 декабрь куни вазирлар маҳкамаси раиси лавозимидан кетганди. У бу лавозимда уч йил-у икки ой ишлади.
Солиқ соҳасида коррупцион схема
2024 йил 3 декабрь куни Бишкекда пойтахтнинг барча тўртта туман бошқармалари солиқчилари оммавий равишда ҳибсга олинди. Миллий хавфсизлик давлат қўмитаси ходимлари тинтув ўтказиб, тўрт нафар бошқарма бошлиғи ва 30 нафарга яқин оддий ходимни сўроқ қилган.
Парламентда сўзга чиққан Миллий хавфсизлик давлат қўмитаси раҳбари Қамчибек Ташиевга кўра, солиқчилар электрон товар-транспорт юк хати билан боғлиқ коррупцион схемани яратган. Бу эса мамлакат бюджетига 3,2 миллиард сом зарар етказган.
5 декабрь куни Давлат солиқ хизмати бошлиғи ўринбосари Исломбек Қидиргичев сўроқ учун чақирилган, кейин эса ҳибсга олиниб, ДХХ тергов ҳибсхонасига киритилган. Яна бир ўринбосар сўроқдан сўнг қўйиб юборилган.
Изоҳ (0)