Давлат хавфсизлик хизмати республиканинг турли вилоятларида гиёҳванд моддалар савдоси билан шуғулланиб келган шахслар фаолиятига чек қўйди.

Хусусан, ДХХнинг Бухоро вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда тезкор тадбир ўтказилган. Тадбирда 1970 йилда Сурхондарё вилоятининг Денов туманида туғилган, муқаддам гиёҳвандлик воситалари билан боғлиқ жинояти учун судланган, ҳозирда Когон туманидаги фермер хўжалигида қоровул бўлиб ишловчи фуқаро ушланган ва ундан келгусида сотиш мақсадида сақлаб келинаётган 581 грамм опий моддаси процессуал тартибда расмийлаштириб олинган.

Шунингдек, тезкор суриштирув ҳаракатлари давомида Бухоро шаҳрида яшовчи, 62 ёшли фуқаро ушбу наркосавдогардан муқаддам 158 грамм опий моддасини сотиб олгани аниқланиб, ундан ҳам ашёвий далиллар тегишли тартибда расмийлаштириб олинган.

Таъкидланишича, мазкур гиёҳвандлик воситалари мамлакатга Тожикистондан контрабанда йўли билан олиб келинган.

Сирдарё вилоятида кузатилган ҳолатда эса Сурхондарё—Тошкент йўналишида ҳаракатланаётган Cobalt русумли автомашина ДХХ, ички ишлар ва божхона органлари ходимлари томонидан “Сирдарё” ЙПХ масканида тўхтатилиб текширилган. Текширув давомида унда йўловчи сифатида кетаётган Денов туманида яшовчи 26 ёшли фуқаро ёнида 286 грамм гашиш моддаси борлиги аниқланган ва ашёвий далил сифатида расмийлаштириб олинган. Аниқланишича, мазкур гиёҳвандлик воситалари Тожикистондан олиб келинган.

Бундан ташқари, Фарғона шаҳрида яшовчи 25 ёшли фуқаро бошқарувидаги Malibu русумли автомашина “Қува—Фарғона” йўналишида ҳаракатланаётган вақтида тўхтатилганда, у ходимларнинг қонуний талабларига бўйсунмасдан, воқеа жойидан қочишга уринган.

Бироқ тезкор гуруҳ томонидан кўрилган чоралар натижасида автомашина тўхтатилиб, унинг ҳайдовчиси ва салонида бўлган икки фуқаро ушланган ҳамда улар томонидан йўл четига улоқтириб юборилган 905 грамм гашиш моддаси процессуал тартибда расмийлаштириб олинган.

Сўнгра Наманган вилоятининг Тўрақўрғон туманида яшовчи, 29 ёшли фуқаро бошқарувидаги Matiz русумли автомашина Марғилон шаҳрида тўхтатилиб текширилганда, унда йўловчи сифатида кетаётган Наманган шаҳрида яшовчи, 34 ёшли фуқарога тегишли 925 грамм гашиш моддаси борлиги маълум бўлган ва ашёвий далил сифатида расмийлаштириб олинган.

Шунингдек, тезкор тадбир давом эттирилиб, ушбу наркотик моддаларни Тожикистондан буюртма қилиб, Қирғизистон орқали олиб келтирган Бешариқ туманида яшовчи 40 ёшли шахс ҳам ушланган.

Бошқа ҳолатда эса Фарғона шаҳрида истиқомат қилувчи 34 ёшли фуқаро Қирғизистондан контрабанда йўли билан келтирилган 957 грамм гашиш моддасини олиб, йўловчи машинада Қува тумани ҳудудида ҳаракатланаётган вақтида қўлга олинган.

Наманган—Қўқон йўналишида ҳаракатланаётган, Қўқон шаҳрида истиқомат қилувчи 27 ёшли фуқаро бошқарувидаги Lacetti русумли автотранспорт воситаси Қўқон шаҳри ҳудудида тўхтатилиб кўздан кечирилганда, автомашина салонида 833 грамм гашиш моддаси борлиги маълум бўлган ва процессуал тартибда расмийлаштириб олинган.

Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Гиёҳванд моддалар савдоси

Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.

Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.