Қирғизистонда 11-12 декабрь кунлари электр энергияси истеъмоли рекорд даражага етди. Бу ҳақда республика Энергетика вазирлигига таяниб, 24.kg хабар берди.
Қиш кириб келиши ва ҳаво ҳароратининг пасайиши туфайли аҳоли электр энергиясидан кўпроқ фойдалана бошлаган. 12 декабрда 3 минг 612 мегаватт электр энергияси истеъмол қилиниб, кунлик электр энергияси истеъмоли 78,931 миллион киловатт-соатга етган. Бундай кўрсаткич Қирғизистон тарихида кузатилмаган.
Электр энергияси истеъмолининг сўнгги рекорди 2023 йил 14 декабрда қайд этилганди. Ўшанда истеъмол қуввати 3 минг 401 мегаваттни ташкил этиб, кунлик истеъмол 73,3 миллион киловатт-соатга етган.
Ҳозирда электр энергиясидан ортиқча фойдаланилаётган ҳудудларда электр тармоғидаги ускуналар ҳаддан ташқари юкланмоқда. Бундай вазиятда абонентларнинг электр таъминотини бошқа линияга (фидерга) ўтказиш учун энергетикларга 1-2 соат вақт керак бўлади.
Шу сабабли, электр энергиясини вақтинча узиб қўйишга тўғри келади. Агар энергетиклар бундай чора кўрмаса, қимматбаҳо энергетика ускуналари ишдан чиқиши мумкин.
Мисол учун, қуввати 250 мегаватт бўлган 220 килoволтли трансформаторнинг нархи 1 миллион 518 минг долларни ташкил этади. Уни тайёрлаш ва етказиб бериш муддати 150 календарь кунни ўз ичига олади. Трансформаторни қайта ўрнатиш учун эса тахминан 1-1,5 ой вақт кетади. Бу жуда кўп куч ва маблағ талаб қиладиган жараёндир.
Изоҳ (0)