Россияда 500 дан ортиқ Тожикистон фуқароси гиёҳванд моддалар билан боғлиқ жиноятларни содир этганликда гумонланиб қўлга олинди. Бу ҳақда Тожикистон президенти ҳузуридаги Наркотик моддаларни назорат қилиш агентлиги директори Зафар Самад хабар берди.
“2024 йилнинг биринчи ярмида Россияда 500 дан ортиқ Тожикистон фуқароси гиёҳванд моддалар савдоси билан боғлиқ жиноятларни содир этганликда гумонланиб қўлга олинди”, дейди Самад.
У Тожикистоннинг 23 нафар фуқароси Ўзбекистонда, уч нафари эса Қозоғистонда ҳибсга олинганини айтди. 2024 йилнинг дастлабки олти ойида чет элда 528 нафар Тожикистон фуқароси қўлга олинган, бу ўтган йилнинг шу даврига қараганда 82 кишига кам, ўшанда қўлга олинганлар сони 610 кишини ташкил этган. Хорижда қўлга олинган барча Тожикистон фуқароларидан жами 96 килограмм гиёҳвандлик воситалари мусодара қилинган.
Шунингдек, Тожикистонда контрабанда ва гиёҳванд моддалар савдоси учун қўлга олинган хорижликлар сони икки баравар кўпайиб, 2024 йилнинг биринчи ярмида 10 кишига етган. Уларнинг беш нафари Афғонистон, уч нафари Ўзбекистон, бир нафари Қозоғистон ва бир нафари Қирғизистон фуқаролари бўлган.
Изоҳ (0)