Австралиядаги лабораториядан 300 дан ортиқ хавфли вирус намуналари йўқолди. Бу ҳақда Квинсленд ҳукуматига таяниб, Fox News хабар берди.
Маълум қилинишича, хавфли инфекциялар, шу жумладан, Хендра вируси ва хантавирус солинган 323 та флакон йўқолган. Журналистлар юқумли намуналар ўғирланганми ёки йўқ қилинганми, номаълумлигини айтмоқда.
Ҳукумат Австралиянинг жамоат саломатлиги департаменти Queensland Health’га “биохавфсизлик протоколларининг катта тарихий бузилиши” деб таърифланган ҳолат бўйича тергов бошлашни топширган.
“Вазият зудлик билан чоралар кўришни талаб этмоқда”, деди Квинсленд ҳокимияти вакиллари. Улар инфекциялар тарқалиши хавфи паст эканини айтмоқда.
Бостондаги Шимолий-Шарқий университетнинг сунъий интеллект ва ҳаёт фанлари бўлими директори, фалсафа доктори Сем Скарпино намуналари йўқолган бир нечта вируслар ўлимга олиб келишини тасдиқлади. Бироқ уларнинг аксарияти одамдан одамга юқмайди, шу сабабли эпидемия хавфи паст.
Fox News хабар беришича, намуналар йўқолган лаборатория “тиббий аҳамиятга эга бўлган чивинлар ва каналар ташийдиган вируслар ҳамда патогенларни ташхислаш, кузатиш ва ўрганиш хизматларини” тақдим этади.
Изоҳ (0)