Россияда COVID-19 нинг янги тўлқини юз бермоқда, бунга коронавирус дельта («ҳиндча») штамми билан боғлиқ вазият сабаб бўлган.
Россияда кетма-кет саккизинчи кун COVID-19 дан суткалик ўлимлар сони 900 кишидан ошди. Ўтган бир кеча-кундузда инфекция юқтирганлар сони 28 717 кишини ташкил қилган, 21 801 бемор касалликдан тузалган, 984 киши вафот этган. Умуман олганда, Россияда пандемия даврида касалликдан 219 329 та ўлим қайд этилган.
Россия пойтахти Москвада коронавирусга чалинганлар сони кескин ошди, ўтган суткада пойтахтнинг яна 4 410 аҳолисида инфекция қайд этилган. Шу сабабли Москва маъмурияти ресторанларга ташриф буюрувчиларнинг QR-кодларини текшириш тизимини қайта жорий қилиш зарурлигини муҳокама қилмоқда. Қайд этилишича, агар пойтахтда касалланиш ҳолати кунига 6-7 мингтага етса, QR-код тизимини қайтариш мумкин. Шаҳар ҳокимияти москваликлардан транспортда, дўконларда ва бошқа жамоат жойларида ниқоб тақиш ва қўлқоп кийиш режимига қатъий риоя қилишни сўради.
Маданий-кўнгилочар тадбирларга кираверишдаги QR-кодлар тизими аллақачон Россиянинг 26 ҳудудида жорий қилинган. Кириш учун QR-код тизими 22 та ҳудудда кафе ва ресторанларга, 25 та ҳудудда спорт тадбирларига, 13 та ҳудудда меҳмонхонага ташриф буюриш учун жорий этилган.
Россия ҳудудларида янги чекловлар ўрнатилди
Маълум қилинишича, Калининград вилоятида «COVID-19 билан боғлиқ ўта оғир вазият» туфайли мунтазам тиббий ёрдам кўрсатиш тўхтатилиши, кафе ва ресторанлар (8 октябрдан уларга сертификатсиз кириш тақиқланган) билан бирга барча жамоат жойларида QR-код тизими жорий этилиши мумкин. Ҳозирда Новосибирск, Свердловск ва Смоленск вилоятлари, Карелия, Мари Эл ва Коми Республикасида QR-код тизимининг у ёки бу шаклда жорий этилиши эълон қилинган.
Москвада бир қатор соҳалардаги иш берувчилар ходимларнинг камида 60 фоизини 15 июлгача биринчи доза билан, 15 августгача эса иккинчи доза билан эмланишини таъминлаши керак эди. Брянск вилоятида 28 июнь куни амалдорлар ва оммавий тадбирлар ишчилари, шунингдек, турли соҳа ходимларининг камида 60 фоизини эмлаш ҳақида эълон қилинганди. Тверь вилоятида айрим тоифадаги фуқароларнинг 60 фоизи 18 июлгача биринчи компонент билан, 18 августгача иккинчи доза билан эмланиши шарт эди. Санкт-Петербургда амалдорлар ва давлат хизматчилари учун мажбурий эмлаш жорий этилган, уларнинг 65 фоизи 15 августга қадар эмланиши керак эди.
3 октябрь куни Тамбов вилоятида эмланиши керак бўлган кишиларнинг ҳаммасини ноябрь ойининг бошига қадар тўлиқ эмлашга қарор қилинди. Нижегород вилоятида 7 октябрдан бошлаб саноат ишчилари учун мажбурий эмлаш жорий этилган. Баъзи тоифадаги ишчиларнинг камида 60 фоизи эмлашнинг биринчи компонентини 25 июлгача, иккинчисини 30 августгача олиши керак эди. Свердловск вилоятида 25 октябрда амалдорларнинг барчаси эмланиши керак. Ленинград вилоятида 15 ноябрдан бошлаб иш берувчилар таълим, соғлиқни сақлаш ва ижтимоий ҳимоя соҳасидаги ходимларнинг ҳаммасини вакцинациядан ўтказиши шарт.
Москвада коронавирусга қарши кураш чоралари
Қайд этилишича, 2020 йил 5 мартдан пойтахтда коронавирус билан боғлиқ вазият туфайли юқори шайлик режими жорий қилинган. Иш берувчилар ходимларнинг ҳароратини ўлчаши ва ҳарорати юқори бўлганларни ишдан бўшатиши лозим. Ўткир респиратор вирусли инфекция белгилари пайдо бўлганда, аҳоли дарҳол тиббий ёрдамга мурожаат қилиши шарт. Шунингдек, Москвадаги иш берувчиларга ходимларни иложи борича масофадан ишлаш режимига ўтказиш тавсия этилади. Бундан ташқари, Москва мэри Сергей Собянин бир-икки ҳафта ичида пойтахтда кенг кўламли COVID-19 экспресс-тест тизимини жорий этишга ваъда берди.
Сабаблар
Расмийларнинг фикрича, мамлакатда касалланишнинг кескин ўсишига сабаб кузги мавсумнинг бошланиши бўлиб, у ўткир респиратор вирусли инфекцияларга чалинишнинг кўпайиши, шунингдек, фуқароларнинг таътилдан ва дала ҳовлилардан оммавий равишда қайтиши, мактаб фаолиятининг қайта тикланиши ҳолатида алоқалар сонининг кескин кўпайиши билан тавсифланади.
Шу билан бирга, терапевт-врач, клиник фармаколог Андрей Кондрахиннинг фикрича, сўнгги кунларда коронавируснинг тез тарқалиши ва оғир кечиши дельта штамми билан, шунингдек, россияликларнинг эпидемияга қарши чораларга бепарво муносабати билан боғлиқ. Шифокорнинг айтишича, одамлар ушбу хавфли вирус билан касалланса-да, шифохонага бормасдан уйда даволаниш орқали инфекциянинг янада кенг тарқалишига замин яратмоқда.
Изоҳ (0)