Келажакда Ер юзида инсоният назорат қила олмайдиган хавфли вирус пайдо бўлади. Бу ҳақда ЖССТ раҳбари Тедрос Гебрейесус Г20 давлатларининг молия ва соғлиқни сақлаш вазирларининг Римда ўтказилган йиғилишида маълум қилди, деб хабар беради «Korrespondent.net».
Унинг сўзларига кўра, Ерда тарқалишини тўхтатиб бўлмайдиган яна бир вируснинг пайдо бўлиши «биология нуқтаи назаридан шубҳасиз» ҳисобланади.
«Ушбу пандемияни тугацак ҳам, биз у берган дарсдан хулоса чиқаришимиз ва кейингисига тайёрланишимиз керак. Биология нуқтаи назаридан қайсидир онда биз шунчаки ушлаб тура олмайдиган вируснинг пайдо бўлиши шубҳасиз», — дея таъкидлайди у.
Гебрейесус, шунингдек, «юқори даражадаги хавфлар»га қарши курашда «юқори даражадаги сиёсий иштирок» зарурлигини таъкидлаган.
У Г20 учрашуви иштирокчиларини пандемияга тайёргарлик кўриш ва унга қарши курашиш бўйича юридик жиҳатдан мажбурият юкловчи халқаро шартномани тузишни қўллаб-қувватлашга чақирган. Бу борадаги тегишли қарорни ноябрь ойида ўтказиладиган Жаҳон соғлиқни сақлаш ассамблеясининг махсус сессиясида қабул қилиш режалаштирилмоқда.
ЖССТ раҳбари, шунингдек, дунёда вакциналардан фойдаланишда тенглик йўқлигига эътибор қаратиб, ҳозирда вирусга қарши сайёра аҳолисининг 36 фоизи тўлиқ эмлангани, Африкада эса ушбу кўрсаткич «атиги 6 фоиз» эканини эслатиб ўтган.
ЖССТнинг 29 октябрь ҳолатидаги маълумотларига кўра, пандемия бошланганидан буён ер юзида 245 миллиондан ортиқ одам коронавирусга чалинган ва 4,97 миллиондан ортиқ одам унинг қурбонига айланган.
Аввалроқ Гебрейесус инсониятнинг вирус устидан ғалаба қозонишга барча имкониятлари мавжудлиги, аммо дунё ушбу воситалардан яхши фойдалана олмаётганини маълум қилганди. Октябрь бошларида эса БМТ Бош ассамблеясининг раҳбари 2023 йилгача дунё аҳолисини COVID-19 га қарши эмлашга эришиш зарурлигини айтган эди.
Изоҳ (0)