Жаҳон соғлиқни сақлаш ташкилоти (ЖССТ) эпидемиологи Ричард Пибоди парранда гриппи сабабли янги пандемияга тайёр бўлишга чақирди. Бу ҳақда El Pais хабар берди.
Мутахассиснинг таъкидлашича, дунё одамдан одамга тарқалиш қобилиятига эга бўлган парранда гриппига тайёр бўлиши керак.
“Вирус одамдан одамга тарқалиши қобилиятига эга бўлиши ва янги пандемияга олиб келиши мумкинлиги бўйича хавотир бор. Бунга тайёргарлик кўришимиз керак. Илмий ҳамжамият ушбу вирусларни кузатиш, керак бўлганда мавжуд бўладиган вакциналарни ишлаб чиқиш учун уларнинг генетик кетма-кетлигини ўрганмоқда”, — деди Пибоди.
Эпидемиологнинг тушунтиришича, дунё бўйлаб миллионлаб ҳайвон ва қушларни нобуд қилган парранда гриппининг янги эпидемияси икки-уч йил аввал А(H5N1) вирусининг махсус тури туфайли бошланган.
“Ҳушёр бўлишга чақирмоқдамиз. Одамлар ўлик ёки ўлаётган қушларни ёки бошқа ҳайвонларни олмаслиги керак. Парранда фабрикаларидагилар яхши ҳимояланиши зарур”, — деб огоҳлантирди мутахассис.
Бу муаммо айниқса қишлоқ жойларида парранда боқиш одатий ҳол бўлган паст даромадли оилалар орасида хавфли бўлиши мумкин. Ўта хавфли парранда гриппи эпидемияси биринчи марта 1996 йилда қайд этилган. 2003 йилдан бошлаб касаллик ҳолати қушлар билан яқин алоқада бўлган одамларда ҳам қайд этила бошланган. Гриппнинг бу штамми унинг пастки нафас йўллари орқали тез тарқалиши сабабли хавфли бўлиб, бу даврда вирусли пневмония, ўткир респиратор дистресс синдромини келтириб чиқаради.
Изоҳ (0)