Омикрон штаммининг тез тарқалиши коронавируснинг янги мутацияларига олиб келиши мумкин, дейди америкалик мутахассислар.
«Омикрон қанчалик тез тарқалса, янги вариантларга олиб келадиган мутациялар учун шунчалик кўп имконият яратилади», — дея Бостон университети эпидемиологи Леонардо Мартинеснинг сўзларини келтирган Associated Press.
Жонс Ҳопкинс университетининг юқумли касалликлар бўйича мутахассиси Стюарт Кемпбелл Рей янги штаммлар пайдо бўлиши учун «жуда кенг тарқалган инфекция» зарурлигини тасдиқлаган. Шу билан бирга, Рейнинг сўзларига кўра, омикрон штамми коронавирус оқибатидаги ўлимларнинг пасайишига олиб келмаслиги мумкин. Омикрон аввалги штаммларга қараганда унчалик хавфли эмас, деб ҳисобланади, аммо бу коронавируснинг кейинги мутациялари ҳам шундай бўлишини англатмайди, дейди мутахассис.
«Одамларда вақт ўтиши билан вирус юқиши осонлашадими, деган савол туғилмоқда. Аммо бунинг учун алоҳида сабаб йўқ. Вируснинг ҳалокатлилик даражаси камайишига ишончимиз комил эмас», — таъкидлаган Рей.
Унинг сўзларига кўра, агар вирус ўз ташувчисини қисқа вақтда ўлдирса ҳам, фаол равишда тарқала олмаса ҳам, инфекцияни бир вақтнинг ўзида ўта юқумли ва хавфли бўлишига имкон берувчи бошқа схемалар мавжуд. Масалан, вирус шундай жойлашиши мумкинки, уни юқтиргандан сўнг одам осонгина касалланади ва бу вақтда бошқаларга ҳам фаол юқтиради, сўнг уларнинг аҳволи ёмонлашади.
Бу олимларнинг янги штаммлар хавфи ҳақида биринчи марта огоҳлантириши эмас. «Вируснинг эволюцияси омикрон вариантида тўхтайди, деган фикр — содда ўйлаш. Агар эволюция жараёнида шароитга кўпроқ мос келадиган штамм танланса, у ҳолда омикрон сиқиб чиқарилади, кейингиси пайдо бўлади», — деганди Россия Соғлиқни сақлаш вазирлигининг юқумли касалликлар бўйича бош мустақил мутахассиси Владимир Чуланов «РБК»га берган интервьюсида.
Изоҳ (0)