Миллий тиббиёт марказида Трансплантология ҳамда Интервенсион ва эндоваскуляр хирургия бўлимлари ҳамкорлигида Ўзбекистон тарихида биринчи марта ноёб жарроҳлик амалиёти муваффақиятли амалга оширилди. Бу ҳақда марказ матбуот хизмати хабар берди.
(Интервенсион жарроҳлик беморнинг танасига минимал даражада аралашиш билан муолажалар ўтказилишини англатади — таҳрир.)
53 ёшли беморга аорта ёйи аневризмаси қатламланишини эндопротезлаш ҳамда чап уйқу артериясини ўнг уйқу артериясига шунтлаш бўйича икки мураккаб жарроҳлик усули бир вақтнинг ўзида қўлланилди.
Аорта ёйи аневризмасининг эндопротезлаш усули
Ушбу усул давомида беморнинг аорта деворидаги заифлашган ва қатламланган қисми махсус стенограф ёрдамида мустаҳкамланди. Аорта ёйи аневризмаси қатламланиши аортанинг ёрилиш хавфини келтириб чиқарадиган оғир ҳолат ҳисобланади.
Жарроҳлик давомида катта кециклар қилинмасдан, эндопротез аорта ичига жойлаштирилди, натижада қон оқими тикланиб, бемор ҳаётининг хавфсизлиги таъминланди.
Чап уйқу артериясини ўнг уйқу артериясига шунтлаш
Қон-томир хирурглари жамоаси томонидан бажарилган ушбу мураккаб жарроҳлик усули артериал қон айланишини тиклашга қаратилди. Шунтлаш усули юқори аниқликни талаб қилади. Амалиёт давомида қон таъминоти муаммоларини бартараф этиш мақсадида чап уйқу артерияси ўнг уйқу артериясига улаб берилди.
“Ушбу ноёб операция Ўзбекистонда илк марта бажарилди ва халқаро стандартларга тўлиқ мос келди. Бир вақтнинг ўзида икки мураккаб жарроҳлик усулининг қўлланилиши Миллий Тиббиёт Маркази мутахассисларининг юксак маҳорати ҳамда замонавий технологияларни қўллаш имкониятини намоён этди” дейилади Тиббиёт маркази матбуот хизматида.
Изоҳ (0)