“Дарё”да Наманганда кесарча кесиш билан она бўлган аёл қорнида тиббий дока, резина қўлқоп қолиб кетгани маълум бўлгани хабар қилинганди. Мазкур мақоладан сўнг, Соғлиқни сақлаш вазирлигининг бош акушер-гинекологи Наманганга етиб борди. Бу ҳақда вазирликнинг Наманган вилояти бошқармаси ахборот хизмати маълум қилди.
Мазкур ҳолат юзасидан Соғлиқни сақлаш вазирлиги бош акушер-гинекологи, тиббиёт фанлари доктори Л.Абдуллаева бошчилигидаги малакали мутахассислар гуруҳи томонидан дастлабки ўрганишлар олиб борилди, дейилади масъуллар бу ҳақдаги маълумотида.
Маълум бўлишича, 2024 йилнинг 11 май куни соат чамаси 09:00 ларда Чортоқ тумани, “Алихон” МФЙда истиқомат қилувчи 33 ёшли фуқаро Б.У. туман тиббиёт бирлашмаси туғуруқ бўлимига тиббий кўрикдан ўтиш мақсадида келган.
Ўтказилган дастлабки тиббий текширувлардан сўнг аёлга “3-ҳомиладорлик. 39-ҳафта, 3 кун. Бачадон чандиғи. Камқонлик ўрта даражаси. ААА (2 марта кесарча кесиш)” ташхиси қўйилиб, туғуруқхонага ётқизилган. Шундан сўнг бемор ҳолати ҳақида Республика ихтисослаштирилган она ва бола саломатлиги илмий-амалий тиббиёт маркази Наманган вилояти филиалига хабар берилиб, даволаш жараёнлари учун мазкур муассасадан мутахассис чақирилган. Шу куни соат чамаси 15:40 ларда тиббий кўрсатмага мувофиқ аёлда филиал гинекология бўлими мудири, тиббиёт фанлари доктори Т.Абдукаримов ва туғуруқхона бўлими мудири Х.Абидова томонидан кесарча кесиш амалиёти бажарилган. Жарроҳлик жараёни санитария қоидаларига тўлиқ риоя қилинган ҳолда ва тегишли стандартлар асосида амалга оширилган. Операция давомида аёл розилиги билан ИЖК (ихтиёрий жарроҳлик контрацепсияси) қилинган. Амалиёт асоратсиз ўтган, дейди масъуллар.
Бошқарманинг билдиришича, мақолада тилга олинганидек, янги туғилган чақалоқ вафот этган.
Аёлнинг ҳомиласи бактериал ва вирусли инфекция туфайли антенатал даврда вафот этган. Анамнезига кўра, бемор ҳомиладорлик даврида камсувлик, 2-3 марта ЎРВИ ва ўткир сийдик йўллари инфекциясига қарши даволанган. Мурдани оила аъзолари суд-тиббий экспертизасидан ўтказишни ёзма равишда рад этгани сабабли туғуруқхона мудираси томонидан уйига бериб юборилган. Шу боис мазкур ҳолат юзасидан туғуруқхона бўлими мудири Х.Абидовага нисбатан интизомий жазо чораси қўлланди, дейди бошқарма масъуллари.
Қайд этилишича, жарроҳликдан сўнг беморнинг бачадони доим тоза бўлган (бир неча марта УТТ текшируви ўтказилган) ва туғуруқдан кейинги 31-кунда нормал ҳайз цикли бошланган. Ундан кейинги 10-кунда аёл ўткир замбуруғли колпит билан уй шароитида мустақил даволанган. Яъни ўзбошимчалик билан замбуруққа қарши тиббий шамчалар ва дока тампондан фойдаланган.
Сўнгги ойларда бемор соғлиғининг ёмонлашишига айнан ўткир замбуруғли колпит билан касалланиши, сийдик йўллари инфекциясининг такрорланиши ва лактация қайталаниши биргаликда кечгани сабаб бўлган. Яъни ишчи гуруҳи томонидан ижтимоий тармоқларда аёл қорнида тиббий дока ва резина қўлқоп қолиб кетгани ҳақида тарқалган хабарлар мутлақо асоссиз экани ҳақида хулоса берилди. Фақат аёлнинг қинидан (қорни ёки бачадонидан эмас) мустақил даволанишда ишлатилган тиббий шамча ва тампон қолдиқлари тушган. Фуқаро томонидан олинган суратда айнан ушбу воситаларнинг қолдиқлари (ишчи гуруҳга тақдим этилган) акс этган. Ҳомиланинг тирик ёки ўлик ҳолда туғилганини билиш учун эксгумация ҳамда қиндан чиққан ажралмалар нима эканлигини аниқлаш мақсадида суд-тиббий экспертизаси ўтказиш сўралганда, фуқаро Б.У. ҳар иккала текширувни ҳам рад этди. Ишчи гуруҳ томонидан ўтказилган сўнгги тиббий кўрик (акушерлик, умумий ва УТТ текшируви) натижасига кўра, айни пайтда аёлнинг умумий ҳолати қониқарли, дейилади бу ҳақдаги муносабатда.
Изоҳ (0)