Milliy tibbiyot markazida Transplantologiya hamda Intervension va endovaskulyar xirurgiya bo‘limlari hamkorligida O‘zbekiston tarixida birinchi marta noyob jarrohlik amaliyoti muvaffaqiyatli amalga oshirildi. Bu haqda markaz matbuot xizmati xabar berdi.
(Intervension jarrohlik bemorning tanasiga minimal darajada aralashish bilan muolajalar o‘tkazilishini anglatadi — tahrir.)
53 yoshli bemorga aorta yoyi anevrizmasi qatlamlanishini endoprotezlash hamda chap uyqu arteriyasini o‘ng uyqu arteriyasiga shuntlash bo‘yicha ikki murakkab jarrohlik usuli bir vaqtning o‘zida qo‘llanildi.
Aorta yoyi anevrizmasining endoprotezlash usuli
Ushbu usul davomida bemorning aorta devoridagi zaiflashgan va qatlamlangan qismi maxsus stenograf yordamida mustahkamlandi. Aorta yoyi anevrizmasi qatlamlanishi aortaning yorilish xavfini keltirib chiqaradigan og‘ir holat hisoblanadi.
Jarrohlik davomida katta kesiklar qilinmasdan, endoprotez aorta ichiga joylashtirildi, natijada qon oqimi tiklanib, bemor hayotining xavfsizligi ta’minlandi.
Chap uyqu arteriyasini o‘ng uyqu arteriyasiga shuntlash
Qon-tomir xirurglari jamoasi tomonidan bajarilgan ushbu murakkab jarrohlik usuli arterial qon aylanishini tiklashga qaratildi. Shuntlash usuli yuqori aniqlikni talab qiladi. Amaliyot davomida qon ta’minoti muammolarini bartaraf etish maqsadida chap uyqu arteriyasi o‘ng uyqu arteriyasiga ulab berildi.
“Ushbu noyob operatsiya O‘zbekistonda ilk marta bajarildi va xalqaro standartlarga to‘liq mos keldi. Bir vaqtning o‘zida ikki murakkab jarrohlik usulining qo‘llanilishi Milliy Tibbiyot Markazi mutaxassislarining yuksak mahorati hamda zamonaviy texnologiyalarni qo‘llash imkoniyatini namoyon etdi” deyiladi Tibbiyot markazi matbuot xizmatida.
Izoh (0)