Тошкентнинг Миробод туманида жойлашган 214 ҳамда 65-сонли мактабларда вирусли гепатит касаллиги аниқланганди. Бу ҳақда Санэпидқўмита Тошкент шаҳар бошқармаси ахборот хизмати хабар берди.
Шу боис ушбу мактабларда эпидемиологик суриштирув ҳамда санитария назорати ўтказилди. Назорат давомида:
- ўқувчилар ва ишчи ходимларнинг ўз вақтида тиббий кўрикдан ўтганлик хулосалари;
- шахсий гигиена қоидаларига риоя қилиш тартиби;
- мактаб биносида, синф хоналарда жорий тозалик ишларининг олиб борилиши, жиҳозларнинг созлиги;
- иситиш тизимлари ёқилиб фойдаланишга топширилганлиги;
- ҳожатхоналарда гигиена қоидаларига риоя қилинганлиги ҳамда қўл ювиш мосламалари ва оқава сув тизимининг соз ҳолатдалиги тўлиқ ўрганилиб, текширув ўтказилди.
Текширувлар натижасида мактабнинг санитария ҳолати талабга жавоб бермаслиги маълум бўлганидан сўнг, аниқланган камчиликлар юзасидан мактаб раҳбарига нисбатан маъмурий баённома расмийлаштирилди.
Аввалроқ Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков Тошкентда хавфли вирус тарқалаётгани ҳақидаги хабарларга изоҳ берган эди.
Мутахассиснинг сўзларига кўра, ҳозиргача дунёда коронавируснинг 45 мингга яқин мутациялари юзага келган ва ҳамон бу жараён тўхтагани йўқ.
“Бироқ ўтган даврда улардан фақат 10-15 таси касаллик чақирди, холос. Шу маънода, мутациялардан ваҳима ясаш керак эмас. Ҳозир кузатилаётган ўткир респиратор вирусли инфекциялар авж олиш жараёнини эса табиий ҳолат, деб қабул қилиш зарур. Шу ўринда юртдошларимизга Ўзбекистон ҳудудида қайси вируслар айланиб юрганини кузатиб борувчи мониторинг тизими йўлга қўйилгани, тегишли лабораторияларда беморлардан олинган вирус намуналари доимий равишда текширилиб, таҳлил қилиб борилишини эслатиб ўтмоқчиман.
Шунга асосланиб айтишим мумкинки, бугунги кунда мамлакатимиз ҳудудида тиббиёт учун нотаниш ва номаълум бўлган вируслар айланиб юриши қайд этилгани йўқ. Балки аниқланаётган касалликларнинг аксарияти мавсумий респиратор хасталиклардир”, деган эди Отабеков.
Изоҳ (0)