Фарғона вилоятининг Марғилон шаҳри ҳамда Самарқанд вилоятининг Каттақўрғон туманида уй-жой олиб бериш ва кадастр ҳужжатларини расмийлаштириб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Марғилонда фуқаро М.Т. фуқаро Ш.Ю.нинг ишончига кириб, 4 200 доллар эвазига Фарғона ҳокимлиги балансидаги ордерли уйни унинг номига расмийлаштириб беришни ҳамда уй-жой сотиб олиш учун субсидия олиб беришни ваъда қилган.
Бунинг учун олдиндан 1 200 долларни олган вақтида ашёвий далиллар билан ушланган.
Шунингдек, Каттақўрғон туманида “К.К.С.” МЧЖ раҳбари А.А. (муқаддам фирибгарлик ва бошқа жиноятлари учун судланган) фуқаро М.К.нинг ишончига кириб, унинг “Зарқўрғон” МФЙдаги хонадонининг кадастр ҳужжатларини расмийлаштириб беришни ваъда қилган.
Бунинг эвазига 800 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкентда Давлат кадастрлар палатаси туман филиали бошлиғи 25 минг доллар олаётганида ушланганди. Шунингдек, Навоий, Наманган ва Андижон вилоятларида ноқонуний йўллар билан ер майдонлари олиб беришни ваъда қилган шахслар қўлга олинган.
Изоҳ (0)