Ҳудудларда уй учун кадастр ҳужжатлари чиқгандан кейинги нарх кадастр олишдан олдин таклиф этилаётганидан 19–20 фоизга қиммат. Бу ҳақда Макроиқтисодий ва ҳудудий тадқиқотлар институтининг кўчмас мулк ва ипотека бозори ҳисоботида ёзилган.
Ўрганишларга кўра, қурилиш компаниялари аҳолига уй-жойлар учун икки хил, яъни кадастр ҳужжатлари чиқгунга қадар ва чиқгандан кейинги нархларни таклиф этмоқда.
“Ҳудудларда 1 квадрат метр уй учун кадастр ҳужжатлари чиқгандан кейинги нарх кадастр олишдан олдин таклиф этилаётган нархдан ўртача ҳисобда 19–20 фоизга қимматлашиши аниқланди. Пойтахтда эса мазкур кўрсаткич 35–39 фоизни ташкил қилмоқда. Ҳудудлар кесимида уй-жой нархлари ўртасида катта тафовут мавжуд. Масалан, Тошкент шаҳрида кадастр ҳужжатларини расмийлаштиришдан олдинги ўртача минимум нарх Бухоро вилоятидаги ўртача минимум нархдан 2,2 баробар, Сурхондарё вилоятидаги ўртача минимум нархдан 2 баробар, Тошкент вилоятидаги ўртача минимум нархдан эса 1,5 баробар юқори ҳисобланади”,—дейилади ҳисоботда.
Ҳисоб–китобларга қараганда, пойтахтдаги кадастр ҳужжатларини олгандан кейинги ўртача максимум нарх Бухоро вилоятидаги ўртача максимум нархдан 2,6 баробар юқори. Сурхондарё вилоятидаги ўртача максимум нархдан эса 3,6 баробар баланд, Тошкент вилоятидаги ўртача максимум нархдан эса 2,4 баробар қиммат экани аниқланди.
Аввалроқ Ўзбекистоннинг қайси ҳудудларида уй-жой нархлари ошиши кутилмалари юқорилиги маълум қилинганди.
Изоҳ (0)